Քաղաքականություն
25.12.2025 | 22:25
Բաքվի ծանր հանցագործությունների դատարանն ավարտել է Մինգեչաուրի 34-ամյա բնակիչ, վագներական Ռամիլ Ալիևի դատավարությունը, որը մեղադրվում է Ուկրաինայի դեմ պատերազմում անօրինական զինված խմբավորումների գործունեությանը մասնակցելու մեջ։ Ադրբեջանական լրատվամիջոցների հաղորդմամբ՝ Ռամիլ Ալիևը, որը 2012 թվականից բնակվում էր Ռուսաստանում, դատապարտվել է 18 տարվա ազատազրկման՝ հանցավոր խմբի անդամների հետ միասին կողոպուտի համար։
Ռուսաստանի Պենզա քաղաքի ուղղիչ հիմնարկում պատիժը կրելիս Ալիևը ներում է ստացել՝ Ուկրաինայի դեմ պատերազմին մասնակցելու դիմաց։ 2022 թվականի օգոստոսին նա կամավոր միացել է «Վագներ» մասնավոր ռազմական խմբավորմանը։ Նույն թվականի սեպտեմբերին նա մեկնել է Ուկրաինայի Դոնեցկի մարզ։ Պայմանագրով Ռամիլ Ալիևը մասնակցել է Բախմուտում և Ուկրաինայի այլ շրջաններում ընթացող ռազմական գործողություններին։
Ռամիլ Ալիևն իրեն մեղավոր է ճանաչել առաջադրված մեղադրանքներում։ Իր ցուցմունքում նա նշել է, որ Ռուսաստանում բանտարկված ժամանակ իր մոտ է եկել մի գեներալ և ասել, որ եթե վեց ամիս կռվի Ուկրաինայի դեմ, ապա նրան ներում կշնորհեն և ազատ կարձակեն։
«Եվ ես համաձայնեցի։ Ես կռվեցի 181 օր։ Վերջում ինձ վարձատրեցին և մեդալ շնորհեցին։ Դրանից հետո ինձ ազատ արձակեցին։ Ես վերադարձա Ադրբեջան։ Ես կռվել եմ Ուկրաինայի դեմ ազատության համար»,- նշել է մեղադրյալը։
Ալիևը վիրավորվել է ռուս-ուկրաինական մարտերի ժամանակ։ Նա պարգևատրվել է երախտագիտության մեդալով «Վագներ»-ի ղեկավար Եվգենի Պրիգոժինի կողմից։ Նա նաև պարգևատրվել է «Մարտում ցուցաբերած քաջության համար» մեդալով։
Դատարանը Ռամիլ Ալիևին դատապարտել է 4 տարվա ազատազրկման։
Թարգմանությունը՝ Էմմա Չոբանյանի
