Հայաստանի կառավարությունը կարող է երկաթգծի որոշ հատվածներ հետ վերցնել ՌԴ-ից, եթե վերականգնման աշխատանքների հետ կապված խնդիրներ առաջանան․ ՏԵՍԱՆՅՈՒԹ

«Տարածաշրջանի կոմունիկացիաների բացումն ուղղակիորեն կապված է նաև սահմանազատման գործընթացի հետ, որովհետև, երբ որ մի որևէ հատվածով, ասենք օրինակ, երկաթուղին պետք է անցնի կամ գազամուղ կամ էլեկտրահաղորդման գիծ, կառուցման աշխատանքները սկսելուց առաջ շատ կարևոր է հստակ գծել, թե այդ հատվածով որտեղով է անցնում պետական սահմանը, որովհետև դա նախ կազմակերպչական, տնտեսական, իրավական բազմաթիվ հարցեր ունի»,- այս մասին Կառավարության նիստից հետո լրագրողների հետ զրույցում նշեց վարչապետ Նիկոլ Փաշինյանը։

«Պետք է հասկանալ՝ երկաթուղին եկավ, որ գծից է, որ Հայաստանն է արդեն երկաթուղին, և որ գծից է, որ Ադրբեջանն է, և որ գիծն է, որ նեյտրալ գոտի է: Նույնը մնացած ենթակառուցվածքներին է վերաբերվում։ Մենք հիմա կարևոր ենք համարում, որ Տավուշի հատվածում մինչև առնվազն այս փուլում, գոնե առաջին փուլում, մինչև Իջևան երկաթուղային կայարանը ներառյալ վերականգնման աշխատանքներ իրականացվեն, նաև Ախուրիկի հատվածում Հայաստան-Թուրքիա սահմանից մինչև գործող երկաթուղային հատվածը վերականգնում իրականացվի, և Հայաստան-Ադրբեջան-Նախիջևանի սահմանից մինչև Երասխ վերականգնման աշխատանքներ իրականացվեն»,- նշեց նա:

Փաշինյանը հույս հայտնեց, որ ՌԴ գործընկերները այդ աշխատանքները հնարավորինս արագ կիրականացնեն:

«Եթե հանկարծ դրա հետ կապված որևէ խոչընդոտ լինի, որևէ այլ հարց առաջանա, դուք գիտեք, որ այդ հատվածները նաև ռուսական կոնցեսիայի ներքո են: Ես նաև արտահայտել եմ մեր պատրաստակամությունը, որ Հայաստանի կառավարությունը կարող է այդ հատվածները վերցնել, այսինքն, ետ վերցնել կոնցեսիայից, և մենք պետական բյուջեի մեր միջոցներով այդ վերականգնումները կիրականացնենք, եթե հանկարծ պարզվի՝ Ռուսաստանի Դաշնությունը պատշաճ ժամանակում այդ աշխատանքն իրականացնելու հետ կապված որևէ խնդիր ունի կամ որևէ խնդիր է տեսնում»,- ասաց նա։