29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
Անկանխիկ առևտրից 2 տոկոս հետվճարի հարցը Master և Visa քարտապանների համար դեռ մշուշոտ է
Հասարակություն
25.12.2025 | 16:31
ArCa վճարային քարտերը քիչ են․ քարտերի գերակշիռ մասը տեղական բանկերի կողմից թողարկված Visa ու Master քարտերն են․ Կառավարության նիստին Նիկոլ Փաշինյանի՝ «պետությունում ինչքա՞ն ArCa քարտ կա» հարցին ի պատասխան ասաց Կենտրոնական բանկի ղեկավար Մարտին Գալստյանը։ Նա նաև հայտարարեց, որ այստեղ ճշգրտման հարց կա․
«Կարգով մենք նախատեսել ենք Ձեր ասած co-badge-ը։ Այսինքն՝ Mastercard-ը հիմա արդեն ArCa-ի հետ բանակցում է co-badge-ը անելու համար։ Այդ առաջարկը Visa-ին էլ է արվել, այդ տիպի քարտերը ևս լինելու են հասանելի»։
Նշենք, որ Կառավարության որոշմամբ նախատեսված է, որ ArCa համակարգում ներառված քարտերով անկանխիկ առևտուր անելու դեպքում քաղաքացին 2 տոկոս հետվճար կստանա։ Ուշագրավ է, որ դեռևս նոյեմբերի 27-ի նիստին գործադիրի ղեկավարը հայտնել էր, որ ցանկացած քաղաքացի առևտրի անկանխիկ վճարումներից 2 տոկոս հետվճար է ստանալու նույն քարտին՝ ինքնաշխատ եղանակով:
ԿԲ նախագահ Մարտին Գալստյանը, սակայն, նիստին չհստակեցրեց, թե այլ վճարային համակարգերի հետ համատեղ (co-badge) թողարկվող վճարային քարտերը երբվանից կմիանան հետվճարային համակարգին։ Նշենք, ըստ Ֆինանսների նախարարության հրապարակած նախագծի՝ անկանխիկ առևտրից հետվճար է տրամադրվելու ինչպես ArCa վճարային քարտեր՝ «Արմենիան Քարդ» ՓԲԸ-ի կողմից գործարկվող ArCa վճարային համակարգի ներքո գործող ArCa ապրանքային նշանով վճարային քարտերի, այնպես էլ այլ վճարային համակարգերի հետ համատեղ (co-badge) թողարկվող վճարային քարտերի դեպքում։
Factor.am-ը «Արմենիան Քարդ» ՓԲԸ-ից հետաքրքրվեց՝ արդյո՞ք միայն ArCa վճարային քարտերի դեպքում են անկանխիկ առևտրից հետվճար ստանալու, թե Visa ու Master քարտերն էլ կներառվեն դրանց շարքում։
«Ծրագիրը դեռևս մշակման փուլում է, և հստակ ինֆորմացիա չեմ կարող տրամադրել։ Ամեն դեպքում երբ ծրագիրն արդեն ներդրվի և հստակ ամրագրվի, բնականաբար, մենք համապատասխան տարբերակով կտարածենք ինֆորմացիան։ Ամեն դետալ դեռ քննարկման փուլում է»,- ասաց ընկերության ներկայացուցիչը։
Անկանխիկ գործարքի գումարի հետվճարի չափը ձևավորվում է միջոցառման մասնակից գործընկեր «Արմենիան Քարդ» ՓԲԸ հատկացումներից՝ 1% և պետության կողմից 1% համամասնությամբ:
Հավելենք, որ «Արմենիան Քարդ» ՓԲԸ–ի կողմից գործարկվող ArCa վճարային համակարգի միջոցով ֆիզիկական անձանց տրամադրվող հետվճարները կհաշվարկվեն և կվճարվեն 2026 թ. փետրվար ամսվանից սկսած մինչև 2027 թ. հունվար ամիսը ներառյալ: Որոշումն ընդունվել է Կառավարության այսօրվա նիստի ժամանակ։ Սահմանվել են նաև հետվճար տրամադրելու միջոցառումը և կարգը։
Ըստ այդմ՝ հետվճարը կտրվի մինչև հաջորդ ամսվա 25-ը, ոչ ավելի քան 60.000 դրամը։ Հետվճար չի տրամադրվի տեղեկատվության, կապի և կոմունալ ծառայությունների դիմաց վճարների, ՀՀ պետական և համայնքների բյուջեների օգտին կատարվող վճարումների դեպքում։
Նշվում է, որ նոր համակարգը պիլոտային է, կգործի 2026թ․ հունվարի 1-ից մինչև 2027թ. հունվարը։
Անի Թամրազյան
