23.01.2026 | 19:50
Իրանում 2 հայկական եկեղեցի է վնասվել․ Արաղչին հայտնել է բողոքի ցույցերի ժամանակ 3,117 զոհի մասին
Ադրբեջանի իշխանություններն ուժեղացրել են բռնաճնշումներն ընդդիմադիր «Ժողովրդական ճակատ» կուսակցության նկատմամբ. Human Rights Watch
Քաղաքականություն
24.12.2025 | 22:55
Ադրբեջանի իշխանությունները խստացրել են ընդդիմադիր «Ժողովրդական ճակատ» կուսակցության նկատմամբ բռնաճնշումները՝ տարիներ շարունակ քաղաքական դրդապատճառներով հետապնդումներից և ճնշումներից հետո: Վերջին ամիսներին իշխանություններն ավելի ու ավելի հաճախ են թիրախավորում կուսակցության ղեկավարությանը: Այս մասին գրել է Human Rights Watch-ի Եվրոպայի և Կենտրոնական Ասիայի բաժնի փոխտնօրեն Գիորգի Գոգիան, փոխանցում են ադրբեջանական լրատվամիջոցները։
Դեկտեմբերի 19-ին դատարանը «Ժողովրդական ճակատ» կուսակցության բարձրաստիճան պաշտոնյա Մուրադ Սուլթանին 30-օրյա վարչական կալանքի է ենթարկել։ Որոշումը կայացվել է կուսակցության նախագահ Ալի Քերիմլիի ձերբակալությունից հետո, որը դեկտեմբերի 1-ին մեղադրվել է իշխանությունը բռնի ուժով զավթելու փորձի մեջ։ Իշխանությունները նաև ձերբակալել են նրա մի քանի թիկնապահների և վարորդների։ Ալի Քերիմլիին արգելվել է երկրից դուրս գալ 2005 թվականից։
Գիորգի Գոգիան գրում է, որ Ադրբեջանի իշխանությունները 2025 թվականին ուժեղացրել են ճնշումները «Ժողովրդական ճակատ» կուսակցության նկատմամբ՝ անօրինական կերպով ձերբակալելով կուսակցության տասնյակ անդամների ամբողջ երկրում՝ նրանց անհիմն վարչական և քրեական մեղադրանքներ առաջադրելով։
Դեկտեմբերի 12-ին կուսակցության 22-ամյա անդամ Էլբեգի Քերիմլին, ըստ լուրերի, ինքնասպանության փորձ է կատարել բանտում։ Նա ձերբակալվել է նախկին նախագահ Հեյդար Ալիևի արձանի վրա «Ստալին» գրություն թողնելուց հետո և մեղավոր է ճանաչվել վաճառքի նպատակով մեծ քանակությամբ թմրանյութ պահելու համար։
Գիորգի Գոգիան նաև հիշատակում է այլ ակտիվիստների, որոնք այս տարի ձերբակալվել են տարբեր մեղադրանքներով։
«Ադրբեջանի իշխանությունները պետք է անհապաղ ազատ արձակեն խաղաղ քաղաքական գործունեության համար ձերբակալված բոլոր անձանց, վերացնեն քաղաքական ընդդիմության նկատմամբ սահմանափակումները, այդ թվում՝ Ալի Քերիմլիի նկատմամբ 20-ամյա ճանապարհորդության արգելքը, և ապահովեն կալանքի ընթացքում չարաշահումների և կալանքի տակ մահերի անկախ և անաչառ հետաքննություններ»,- նշել է նա։
Ներկայում «Ժողովրդական ճակատ»-ի ավելի քան 20 անդամներ բանտում են տարբեր մեղադրանքներով: Դեկտեմբերի 1-ին «Ռամիզ Մեհդիևի գործի» շրջանակում կուսակցության նախագահ Ալի Քերիմլիի և կուսակցության նախագահության անդամ Մամեդ Իբրահիմի նկատմամբ խափանման միջոց է ընտրվել կալանքը։
Կուսակցության անդամները հերքում են առաջադրված մեղադրանքները՝ ասելով, որ իրենց քաղաքական գործունեության համար են ենթարկվում ճնշման և ձերբակալությունների:
Ռամիզ Մեհդիևը մեղադրվում է պետական իշխանությունը զավթելու, պետական դավաճանության և հանցավոր ճանապարհով ձեռք բերված ունեցվածքի օրինականացմանն ուղղված գործողությունների համար։ Մեհդիևը հոկտեմբերի 14-ից տնային կալանքի տակ է 4 ամսով։
Թարգմանությունը՝ Էմմա Չոբանյանի
