17.08.2026 | 23:08
Զորականում և Ամասիայում շչակներ են փորձարկվելու
2026-ի բյուջեով 2 մլրդ դրամ՝ Աջափնյակի մետրոյի կայարանի կառուցման աշխատանքների համար
23.12.2025 | 19:50
«Աջափնյակ» մետրոյի կայարանի կառուցման համար նախատեսված 9.6 միլիարդ դրամից մնացել է 1.6 միլիարդ դրամ։ Երևանի ավագանու 5-րդ նստաշրջանի վերջին նիստում այս պնդումն արեց «Մայր Հայաստան» խմբակցության անդամ Աննա Ավետիսյանը։
Երևանի քաղաքապետ Տիգրան Ավինյանը չհերքեց ընդդիմադիր անդամի պնդումները՝ նշելով, որ կրճատված գումարի զգալի մասն ուղղվել է 45 նոր տրոլեյբուսների ձեռքբերմանը, որոնք քաղաքում կլինեն հաջորդ տարի։
2025 թվականի ամռանը Տիգրան Ավինյանի նախկին խոսնակ Հայկ Կոստանյանը հայտարարել էր, որ ուղեվարձի թերհավաքագրումների հետևանքով 45 տրոլեյբուսից 30-ը հնարավորություն չի լինելու գնել։ 2025 թվականի բյուջեով նախատեսվում էր, որ տրանսպորտի ուղեվարձերի եկամտից ստացված միջոցները պետք է լինեին 21 միլիարդ 303 միլիոն 814 հազար դրամ, բայց նոյեմբերի 4-ի դրությամբ՝ փաստացի հավաքագրվել էր 12 միլիարդ 806 միլիոն 901 հազար դրամ։
Ավագանին այսօրվա 5-րդ նստաշրջանի վերջին նիստում հաստատեց 2026 թվականի բյուջեն։ Factor TV-ն տեղեկանում է, որ բյուջեով 2 միլիարդ դրամ նախատեսվել է Աջափնյակ վարչական շրջանի մետրոպոլիտենի նոր կայարանի կառուցման աշխատանքների մեկնարկի իրականացման համար։
Գործադիրը երկու փուլով արդեն ավելի քան 5 միլիարդ դրամ է հատկացրել քաղաքապետարանին՝ 45 տրոլեյբուս գնելու և բազմաբնակարան շենքերի 104 հին վերելակ փոխարինելու նպատակով։ Հատկանշական է, որ 2026 թվականի բյուջեով նախատեսված է 45 տրոլեյբուսների ձեռքբերման պայմանագրի ընդհանուր գումարի 70%-ի վճարումը։ Փաստաթղթում նշվում է, որ պայմանագրի մնացյալ 30%-ը վճարվել է 2025 թվականի բյուջետային տարում:
Արփի Հակոբյան
