09.06.2026 | 14:24
Աֆրիկայի լավագույն մրցավարը չի ստացել ԱՄՆ մուտքի վիզա ու չի սպասարկի ԱԱ-2026-ի խաղերը
Ֆիդանը հայտարարել է, որ քրդական SDF-ը Սիրիայում իր գործողությունները Իսրայելի հետ է համակարգում
Քաղաքականություն
22.12.2025 | 23:22
Թուրքիայի արտաքին գործերի նախարար Հաքան Ֆիդանը հայտարարել է, որ Սիրիայում քրդական SDF-ը որոշակի գործողություններ է իրականացնում Իսրայելի հետ համակարգված, և այս իրողությունը, նրա խոսքով, դարձել է խմբին սիրիական վարչակազմին ինտեգրելուն ուղղված բանակցությունների հիմնական խոչընդոտը, գրում է Turkiye today-ը։
«Մենք տեսնում ենք, որ SDF-ը մեծ առաջընթացի հասնելու մտադրություն չունի։ Այն փաստը, որ SDF-ն որոշակի գործողություններ է իրականացնում Իսրայելի հետ համակարգված, ներկայում լուրջ խոչընդոտ է Դամասկոսի հետ վարվող բանակցություններում»,- ասել է Ֆիդանը Դամասկոսում Սիրիայի արտաքին գործերի նախարար Ասաադ Հասան ալ-Շաիբանիի հետ բանակցություններից հետո համատեղ մամուլի ասուլիսում։
Ֆիդանը նշել է՝ կարևոր է, որ SDF-ն ինտեգրվի սիրիական վարչակազմին երկխոսության և հաշտեցման միջոցով՝ այնպես, որ դա օգուտ բերի բոլոր կողմերին, և դադարի Սիրիայի կայունությանը խոչընդոտ հանդիսանալ։ Նա ասել է, որ իր սիրիացի գործընկերոջ հետ քննարկումներն ընդգրկել են հարցերի լայն շրջանակ, այդ թվում՝ երկկողմ հարաբերությունները, տարածաշրջանային անվտանգությունը և Սիրիայի կայունությանը սպառնացող վտանգները՝ ընդգծելով, որ Սիրիայի կայունությունը ուղղակիորեն կապված է Թուրքիայի սեփական անվտանգության հետ։
Ալ-Շաիբանին էլ անդրադարձել է Սիրիայի հյուսիս-արևելքի հարցին՝ ասելով, որ իշխանությունները չեն տեսել SDF-ի կողմից ինտեգրման որևէ պատրաստակամություն։ Ըստ նրա՝ սիրիական պետությունն ավելի մեծ նշանակություն կտա Ջազիրա շրջանին և ընդգծել, որ պետությունը ներկա կլինի այնտեղ։
Ֆիդանը նշել է, որ Իսրայելի կողմից տարածաշրջանային երկրների հետ փոխադարձ համաձայնության վրա հիմնված մոտեցման ընդունումը՝ էքսպանսիոնիստական քաղաքականության փոխարեն, կնպաստի տարածաշրջանային կայունությանը։ Նա նաև մատնանշել է Սիրիայի կայունության և անվտանգության ոլորտում վերջին մեկ տարվա ընթացքում գրանցված զգալի առաջընթացը՝ նշելով, որ ԱՄՆ Սենատի կողմից «Կեսարի ակտի» պատժամիջոցների չեղարկումը թույլ կտա ներդրումների հոսքը երկիր։
Ինչ վերաբերում է Գազային՝ ըստ Ֆիդանի՝ Թուրքիան ակնկալում է, որ հրադադարի համաձայնագրի երկրորդ փուլը կսկսվի ԱՄՆ նախագահ Դոնալդ Թրամփի կողմից նոր տարվա առաջին շաբաթներին հայտարարվելուց անմիջապես հետո։
Թարգմանությունը՝ Էմմա Չոբանյանի
