19.05.2026 | 18:51
Բելառուսը մտադիր է մասնակցել Արցախի տարածքներում նախագծերին
ԱՄՆ ազգային հետախուզության ղեկավարն հերքել է Ռուսաստանի ծրագրերի մասին Reuters-ի տեղեկությունները
Քաղաքականություն
21.12.2025 | 19:02
ԱՄՆ ազգային հետախուզության տնօրեն Թուլսի Գաբարդը հերքել է Reuters գործակալության հրապարակման մեջ ներկայացված տեղեկությունը, ըստ որի՝ ամերիկյան հատուկ ծառայությունների գնահատմամբ Ռուսաստանի նախագահ Վլադիմիր Պուտինը շարունակում է ձգտել ամբողջությամբ վերահսկել Ուկրաինայի տարածքը և պատրաստվում է գրավել Լիտվան, Լատվիան և Էստոնիան։
«Ո՛չ, սա սուտ է և քարոզչություն։ Reuters-ը դիտավորյալ տարածում է այս հայտարարությունները՝ պատերազմ սատանացնողների շահերից ելնելով, որոնք ցանկանում են թուլացնել նախագահ Թրամփի անդադար ջանքերը՝ կանգնեցնելու այս արյունալի պատերազմը, որի հետևանքով երկու կողմերից էլ ավելի քան մեկ միլիոն մարդ է զոհվել»,-գրել է Գաբարդն իր X էջում։
ԱՄՆ ազգային հետախուզության ղեկավարը նաև նշել է, որ իր ղեկավարած կառույցի գնահատմամբ «Ռուսաստանը ձգտում է խուսափել ՆԱՏՕ-ի հետ ավելի մասշտաբային պատերազմից»։ Ըստ նրա՝ Ուկրաինայում ռազմական գործողությունները ուսումնասիրող մասնագետները կարծում են, որ ներկայում ռուսական բանակը «չունի ամբողջ Ուկրաինան՝ առավել ևս Եվրոպան, գրավելու և օկուպացնելու հնարավորություն»։
Գաբարդի խոսքով՝ այս մասին տեղեկացվել է նաև ԱՄՆ Կոնգրեսի Ներկայացուցիչների պալատի հետախուզական կոմիտեի անդամ, դեմոկրատ կոնգրեսական Մայք Քուիգլին, որը Reuters-ին մեկնաբանություն էր տվել։
«Հետախուզական տվյալները միշտ ցույց են տվել, որ Պուտինը ցանկանում է ավելի շատ։ Եվրոպացիները դրանում վստահ են։ Լեհերը՝ բացարձակ։ Բալթյան երկրները կարծում են, որ իրենք առաջիններն են հերթում»,-նշել էր նա։
Գործակալության՝ դեկտեմբերի 19-ին հրապարակված հոդվածը կազմվել է վեց աղբյուրների հիման վրա։ Նրանցից մեկը հայտնել է, որ Պուտինի ծրագրերին վերաբերող ամերիկյան հետախուզության վերջին զեկույցը ներկայացվել է սեպտեմբերին։ Reuters-ի զրուցակիցները պնդել են, որ Ռուսաստանի նախագահը ձգտում է գրավել ողջ Ուկրաինան։ Այս պնդումները, ինչպես նշված է հոդվածում, հակասում են Դոնալդ Թրամփի և նրա ներկայացուցիչների հայտարարություններին՝ Ռուսաստանի և Ուկրաինայի հետ բանակցությունների ընթացքում։
