Աննախադեպ արդյունք՝ հայկական բռնցքամարտում

Հայաստանի բռնցքամարտի ֆեդերացիան ամփոփել է 2025 թվականը։ Ավարտին մոտեցող տարում հայ բռնցքամարտիկները նվաճել են 78 մեդալ։

«Հայկական բռնցքամարտը մրցաշրջան 2025-ում արձանագրել է բոլոր ժամանակների լավագույն արդյունքը:

Պատմական արդյունք՝ 5 մեդալ մեծահասակների աշխարհի առաջնությունում: Աշխարհի ու Եվրոպայի առաջնություններում ընդհանուր առմամբ 78 մեդալ՝ 11 ոսկե, 34 արծաթե և 33 բրոնզե: Երբևէ օլիմպիական որևէ այլ մարզաձևում 78 հայ մարզիկ մեկ մրցաշրջանում աշխարհի ու Եվրոպայի առաջնություններում պատվո հարթակ չի բարձրացել:

Հայաստանի բռնցքամարտի ֆեդերացիան այս տարի ևս ամենաբարձր մակարդակով անցկացրեց մինչև 23 տարեկանների և երիտասարդների Եվրոպայի առաջնությունները:

Ընդ որում պատմական արդյունք գրանցեցին նաև մեր երիտասարդները ՝ Երևանյան Եվրոպայի առաջնությունում նվաճելով 4 ոսկե , 5 արծաթե և 4 բրոնզե մեդալ: 3 չեմպիոնական տիտղոս էլ ունենցանք մինչև 23 տարեկանների Եվրոպայի առաջնությունում:

Արդյունք անկասկած տպավորիչ է, բայց մենք շարժվելու ենք առաջ: Բռնցքամարտի Հայաստանի ֆեդերացիան, մարզիչներն ու մարզիկները ջանք ու եռանդ չեն խնայելու 2026 թվականին նույնպես մեր երկրին մեծ հաղթանակներ պարգևելու համար»,- նշված է ՀԲՖ-ի հաղորդագրության մեջ։

Հիշեցնենք, որ այս ամիս Դուբայում կայացած աշխարհի առաջնությունում բրոնզե մեդալակիր էին դարձել Ռուդոլֆ Գարբոյանը (51 կգ), Արթուր Բազեյանը (60 կգ), Հովհաննես Բաչկովը (67 կգ), Ռաֆայել Հովհաննիսյանը (86 կգ) և Դավիթ Չալոյանը (+92 կգ)։