Քաղաքականություն
19.12.2025 | 15:50
Մայր Աթոռը չի պարզաբանում` ինչ ճակատագրի է արժանացել երեկ Վեհարանի քարտուղարություն հանձնված նամակը, որով տասը եպիսկոպոսներ պահանջում են Գարեգին Բ-ի հրաժարականը։
Հիշեցնենք՝ Նավասարդ արքեպիսկոպոս Կճոյանը, Վազգեն եպիսկոպոս Միրզախանյանը, Գևորգ եպիսկոպոս Սարոյանը և կաթողիկոսի հրաժարականը պահանջող մյուս հոգևորականները երեկ եկան Վեհարանի դարպասների մոտ, կարճ ելույթ ունեցան՝ տեղեկացնելով, որ դիմումը ներկայացրել են քարտուղարություն։ Factor TV-ն այսօր փորձեց պարզել, թե տասը եպիսկոպոսների նամակին ինչ ընթացք է տրվել։ Մայր Աթոռի տեղեկատվական բաժնի տնօրեն Տեր Եսայի քահանա Արթենյանը նշեց՝ տեղեկություններ չունի, իսկ զարգացումների դեպքում, «եթե անհրաժեշտություն լինի, Մայր Աթոռը կտեղեկացնի»։
Կաթողիկոսարանի ընդհանուր բաժնից էլ փոխանցեցին, որ չեն կարող դիմումի ընթացքի վերաբերյալ որևէ տեղեկություն տալ՝ անպատասխան թողնելով, որևէ մեկին մակագրվե՞լ է հարցը, թե՞՝ ոչ։ Այսօր հայտնի դարձավ, որ Գարեգին Բ-ն փոփոխություններ է կատարել Գերագույն հոգևոր խորհրդի կազմում։
Ըստ Մայր Աթոռի տեղեկատվական կենտրոնի տնօրեն Տեր Եսայի Արթենյանի՝ Հոգևոր խորհրդի կազմից դուրս են եկել Վայոց ձորի թեմի առաջնորդ Աբրահամ արք. Մկրտչյանը, Մասյացոտն թեմի առաջնորդ Գևորգ եպս. Սարոյանը և Վազգեն արք. Միրզախանյանը։ Նրանց փոխարինում են Սյունիքի թեմի առաջնորդ Մակար եպս. Հակոբյանը, Վիրահայոց թեմի առաջնորդ Կիրակոս եպս. Դավթյանը։
Ըստ կառույցի՝ Գերագույն հոգևոր խորհրդի կազմում նշանակվում են կապված աշխարհագրական դիրքից ու տվյալ թեմի առաջնորդ լինելու հանգամանքից։ Նշենք, որ հոգևոր խորհրդից դուրս մնացած բոլոր հոգևորականները պահանջում են Գարեգին Բ-ի հրաժարականը։ Ուշագրավ է, որ կաթողիկոսը հոգևոր խորհրդի կազմից չի հեռացրել իր դեմ դուրս եկած առանցքային դեմքերից մեկին՝ Արարատյան հայրապետական թեմի փոխանորդ Նավասարդ արքեպիսկոպոս Կճոյանին։
Նարեկ Կիրակոսյան
