Բրյուսելում ֆերմերները տրակտորներով փակել են ճանապարհները, ոստիկանների հետ բախումներ են գրանցվել. ՏԵՍԱՆՅՈՒԹ

Հարյուրավոր տրակտորներ խցանել են Բրյուսելի փողոցները, քանի որ ֆերմերները հավաքվել էին Բելգիայի մայրաքաղաքում՝ բողոքելու Եվրամիության և Հարավային Ամերիկայի երկրների միջև վիճելի առևտրային համաձայնագրի դեմ, որը, նրանց խոսքով, կոչնչացնի իրենց ապրուստը, գրում է Al jazeera-ն։

Ցույցերը բռնկվել են նախօրեից, երբ ԵՄ առաջնորդները հավաքվել էին գագաթնաժողովի, որտեղ որոշվում էր Մերկոսուրի համաձայնագրի ճակատագիրը։ Copa-Cogeca ֆերմերային լոբբիի տվյալներով՝ ավելի քան 150 տրակտոր շրջափակել էր Բրյուսելի կենտրոնը, իսկ եվրոպական թաղամասում սպասվում էր մոտ 10,000 ցուցարար։

Ֆերմերները կարտոֆիլ և ձվեր են նետել ոստիկանության վրա, հրավառ նյութեր և ճայթռուկներ, նաև փակել երթևեկությունը։ Իշխանությունները պատասխանել ն  արցունքաբեր գազով և ջրցաններով՝ ճանապարհային արգելապատնեշներ տեղադրելով և քաղաքի շուրջը  փակելով։

Բողոքի ակցիայի մասնակիցները վախենում են, որ Բրազիլիայից և հարևան երկրներից ավելի էժան գյուղատնտեսական արտադրանքի ներհոսքը կնվազեցնի եվրոպական արտադրողների գինը: Նրանց մտահոգությունները կենտրոնացած են հարավամերիկացի մրցակիցների տավարի մսի, շաքարի, բրնձի, մեղրի և սոյայի վրա, որոնք բախվում են ավելի մեղմ կանոնակարգերի, մասնավորապես՝ ԵՄ-ում արգելված թունաքիմիկատների հետ կապված խնդիրների հետ:

Ֆրանսիան և Իտալիան այժմ գլխավորում են համաձայնագրի դեմ պայքարը, իսկ նախագահ Էմանուել Մակրոնը հայտարարում է, որ «մենք պատրաստ չենք» և համաձայնագիրը «չի կարող ստորագրվել» իր ներկայիս տեսքով։ Ֆրանսիան համակարգել է իր գործունեությունը Լեհաստանի, Բելգիայի, Ավստրիայի և Իռլանդիայի հետ՝ հետաձգումը պարտադրելու համար, ինչը քննադատներին բավարար ձայներ է տվել Եվրոպական խորհրդում՝ համաձայնագիրը հնարավոր արգելափակելու համար։

Այնուամենայնիվ, Գերմանիան և Իսպանիան մեծ ջանքեր են գործադրում դրա հաստատման համար: Գերմանիայի կանցլեր Ֆրիդրիխ Մերցը զգուշացրել է, որ որոշումները «պետք է կայացվեն հիմա», եթե ԵՄ-ն ցանկանում է «պահպանել հեղինակությունը համաշխարհային առևտրային քաղաքականության մեջ», մինչդեռ Իսպանիայի վարչապետ Պեդրո Սանչեսը պնդում է, որ համաձայնագիրը Եվրոպային կտա «աշխարհատնտեսական և աշխարհաքաղաքական կշիռ» հակառակորդների դեմ:

Համաձայնագիրը, որի մշակումը տևել է 25 տարի, կստեղծի աշխարհի ամենամեծ ազատ առևտրի գոտին, որը կներառի 780 միլիոն մարդ և համաշխարհային համախառն ներքին արդյունքի (ՀՆԱ) մեկ քառորդը։ Աջակիցները նշում են, որ այն հակակշիռ է Չինաստանին և կխթանի եվրոպական տրանսպորտային միջոցների, մեքենաների և գինիների արտահանումը՝ ԱՄՆ-ի կողմից բարձրացող մաքսատուրքերի ֆոնին։

Ուրսուլա Ֆոն դեր Լեյենը շարունակում է վճռականորեն տրամադրված լինել այս շաբաթավերջին Բրազիլիա մեկնելու՝ համաձայնագիրը ստորագրելու համար, սակայն անհրաժեշտ է ԵՄ երկրների առնվազն երկու երրորդի աջակցությունը։ Բրազիլիայի նախագահ Լուիս Ինասիո Լուլա դա Սիլվան  վերջնագիր է ներկայացրել՝ զգուշացնելով, որ շաբաթ օրը «կամ հիմա, կամ երբեք» պահ է, հավելելով, որ «Բրազիլիան այլևս որևէ համաձայնագիր չի կնքի, քանի դեռ ինքը  նախագահ է», եթե համաձայնագիրը ձախողվի։

Թարգմանությունը՝ Էմմա Չոբանյանի