28.04.2026 | 12:24
Բելգորոդում ուկրաինական ԱԹՍ-ների հարձակումների հետևանքով 3 մարդ է զոհվել
ԱՄՆ-ն դադարեցրել է Գրին քարտի խաղարկության ծրագիրը Ռոդ Այլենդի Բրաունի համալսարանում կրակոցներից հետո
Քաղաքականություն
19.12.2025 | 11:18
ԱՄՆ-ն դադարեցնում է Գրին քարտի խաղարկության ծրագիրը Ռոդ Այլենդի Բրաունի համալսարանում տեղի ունեցած կրակոցներից հետո, քանի որ կրակողը երկիր է մուտք գործել Diversity Lottery (DV1) ծրագրի միջոցով և ստացել է Գրին քարտ։ Այս մասին հայտարարել է ԱՄՆ ներքին անվտանգության նախարար Քրիստի Նոեմը, գրում է Meduza-ն։
«Նախագահ Թրամփի ցուցումով ես անմիջապես հանձնարարել եմ ԱՄՆ քաղաքացիության և ներգաղթի ծառայությանը կասեցնել DV1 ծրագիրը՝ ապահովելու համար, որ այս աղետալի ծրագրից այլևս ոչ մի ամերիկացի չտուժի», – գրել է Նոեմը։
Նրա խոսքով՝ կրակողը Կլաուդիո Մանուել Նևեշ Վալենտեն Միացյալ Նահանգներ է մուտք գործել 2017 թվականին։ Նոեմը հիշեցրել է, որ Թրամփն իր առաջին ժամկետի ընթացքում պայքարել է այդ ծրագիրը դադարեցնելու համար, այն բանից հետո, երբ ԻԼԻՊ-ի ահաբեկիչը բեռնատարով մտել է Նյու Յորք՝ սպանելով ութ մարդու։ Բեռնատարի վարորդը նույնպես երկիր էր մուտք գործել DV1 ծրագրի շրջանակներում։
Դեկտեմբերի 13-ին Բրաունի համալսարանի մոտ տեղի էին ունեցել կրակոցներ, որոնց հետևանքով զոհվել էր երկու ուսանող և վիրավորվել առնվազն ութը։ Կրակողը Պորտուգալիայի 48-ամյա քաղաքացի Կլաուդիո Նևեշ Վալենտեն էր, որը Բրաունում սովորել է ավելի քան քսան տարի։
Ենթադրվում է, որ նա ներգրավված է Մասաչուսեթսի տեխնոլոգիական ինստիտուտի պրոֆեսոր Նունո Լոուրեյրոյի սպանության մեջ, որը տեղի է ունեցել երկու օր անց: Դեկտեմբերի 18-ին իրավապահ մարմինները հայտարարել էին, որ կրակողը մահացած է. նրա մարմինը հայտնաբերվել է Նյու Հեմփշիրի պահեստում: Վալենտեի դրդապատճառները մնում են անհայտ:
Թարգմանությունը՝ Էմմա Չոբանյանի
