Կոնֆերենցիաների լիգա․ «Նոան» պարտվեց Կիևի «Դինամոյին», բայց դուրս եկավ փլեյ-օֆֆ․ ՏԵՍԱՆՅՈՒԹ

Հայաստանի չեմպիոն ու գավաթակիր «Նոան» պարտություն կրեց Կոնֆերենցիաների լիգայի 6-րդ տուրում, բայց նվաճեց փլեյ-օֆֆի ուղեգիր։

Լիգայի փուլի վերջին տուրում երևանյան ակումբը Լեհաստանի Լյուբլին քաղաքում արտագնա հանդիպում անցկացրեց Ուկրաինայի չեմպիոն Կիևի «Դինամոյի» հետ ու պարտվեց 0։2 հաշվով։

Հանդիպման հաշիվը 26-րդ րոպեին բացեց ուկրաինացի վինգեր Վլադիսլավ Կաբաևը (տեսանյութ)։ 50-րդ րոպեին ուկրաինական ակումբի երկրորդ գոլը խփեց ուկրաինացի հարձակվող Մատվեյ Պոնոմարենկոն (տեսանյութ)։

«Նոան» 8 միավորով գրավեց 19-րդ տեղը և պայքարը կշարունակի անցումային փլեյ-օֆֆում, որտեղ կմրցի կամ սլովենական «Ցելյեի», կամ հոլանդական «Ազ Ալկմարի» հետ։ 1/8 եզրափակիչ դուրս գալու դեպքում Սանդրո Պերկովիչի գլխավորած թիմը խաղալու է կամ Աթենքի ԱԵԿ-ի (Հունաստան), կամ Պրահայի «Սպարտայի» (Չեխիա) հետ։

Կոնֆերենցիաների լիգայում 1-8-րդ տեղ գրաված ակումբները դուրս են գալիս 1/8 եզրափակիչ, իսկ 9-24-րդ տեղերի թիմերը՝ անցումային փլեյ-օֆֆ (1/16 եզրափակիչ)։ Փլեյ-օֆֆի վիճակահանությունը կկայանա հունվարի 16-ին։

«Նոան» առաջին հայկական ակումբն է, որը կխաղա եվրագավաթների փլեյ-օֆֆում։

Հիշեցնենք, որ Կոնֆերենցիաների լիգայի այս մրցաշրջանում «Նոան» հաղթել էր խորվաթական «Ռիեկային» (1։0) ու լեհական «Լեգիային» (1։0), ոչ-ոքի խաղացել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ և պարտվել Չեխիայի գավաթակիր «Սիգմային» (1։2)։

Լուսանկարը՝ «Նոայի» մամուլի ծառայության։