20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Վրաստանն արգելել է իր քաղաքացիներին քվեարկել արտասահմանում գտնվելու ընթացքում
Քաղաքականություն
18.12.2025 | 12:34
Վրաստանի խորհրդարանը երրորդ և վերջնական ընթերցմամբ հաստատել է Ընտրական օրենսգրքի փոփոխությունները, որոնք զրկում են արտերկրում բնակվող Վրաստանի քաղաքացիներին երկրից դուրս գտնվելու ընթացքում խորհրդարանական ընտրություններում քվեարկելու հնարավորությունից, հաղորդում է NewsGeorgia-ն, որին վկայակոչում է Current time-ը։ Քվեարկությունը հնարավոր կլինի միայն գրանցման վայրում։ Նույն կանոնները վերաբերում են հանրաքվեներին և պլեբիսցիտին։
Նախկինում այս սահմանափակումը վերաբերում էր միայն մունիցիպալ ընտրություններին, մինչդեռ խորհրդարանական ընտրությունների ժամանակ երկրից դուրս բնակվող Վրաստանի քաղաքացիները կարող էին քվեարկել հյուպատոսություններում և դեսպանատներում տեղակայված ընտրատեղամասերում։
Իշխող «Վրացական երազանք» կուսակցությունն է նախաձեռնել է օրենքը՝ դա հիմնավորելով «արտաքին միջամտությունը կանխելու» անհրաժեշտությամբ։ Կուսակցության ներկայացուցիչների խոսքով՝ Վրաստանից դուրս բնակվող քաղաքացիները գտնվում են «արտաքին իրավասության ներքո» և, իբր, չեն կարողանում «կշռադատված ընտրություն» կատարել։
Վրաստանի Կենտրոնական ընտրական հանձնաժողովի տվյալներով՝ 2024 թվականի խորհրդարանական ընտրություններին արտասահմանում գրանցվել էր մոտ 96,000 ընտրող, սակայն դիվանագիտական ներկայացուցչություններում բացված ընտրատեղամասերի փոքր թվի պատճառով քվեարկել է միայն մոտ 34,000 մարդ։ Արտասահմանում գտնվող ընտրատեղամասերի մեծ մասում հաղթանակ էին տարել ընդդիմադիր կուսակցությունները, այլ ոչ թե «Վրացական երազանքը»։
Ընտրական օրենսգրքում ընդունված փոփոխությունները նաև արգելում են ընտրատեղամասերում ձայնագրությունը (տեսանկարահանումը թույլատրվում է) և արգելում են ոչ կուսակցականներին գրանցվել որպես թեկնածուներ ընտրություններում։ Թեկնածուները պետք է լինեն կուսակցության կամ քաղաքական միավորման անդամներ։
Թարգմանությունը՝ Էմմա Չոբանյանի
