ԵՄ-ն կոչ է անում Թբիլիսիին ազատ արձակել անօրինական ձերբակալվածներին

Եվրոպական Միության Խորհրդի Դանիայի նախագահությունը հրապարակել է ԵՄ Խորհրդի եզրակացությունները ԵՄ ընդլայնման վերաբերյալ, այդ թվում՝ Վրաստանի։ Փաստաթուղթը չի ընդունվել Հունգարիայի կողմից դրա արգելափակման պատճառով։

ԵՄ Խորհուրդը, բացառությամբ Հունգարիայի, կոչ է անում Վրաստանին «ազատ արձակել բոլոր անօրինական ձերբակալվածներին», «չեղարկել բռնաճնշող օրենքները» և «անմիջապես կիրառել վիզային ազատականացման չափանիշները»։

Փաստաթղթում նշվում է, որ Խորհուրդը վերահաստատում է իր աջակցությունը Վրաստանի բնակչության բացարձակ մեծամասնության եվրոպական ապագայի ձգտումներին։

Նշվում է, որ վրացական իշխանությունների գործողությունները չեն համապատասխանում ԵՄ-ի կողմից թեկնածու երկրից ունեցած սպասումներին։

Խորհուրդը նաև նշում է «լուրջ ընդհանուր հետընթաց ժողովրդավարության, մարդու իրավունքների և օրենքի գերակայության ոլորտներում, դատապարտում է Վրաստանի իշխանությունների կողմից ԵՄ-ի դեմ ապատեղեկատվության և պատմությունների տարածումը և կոչ է անում դադարեցնել այս գործելակերպը։ Խորհուրդը նաև ափսոսում է Վրաստանի հետընթացի համար այն ինը քայլերի իրականացման գործում, որոնց հիման վրա երկրին շնորհվել է թեկնածուի կարգավիճակ։

«Համապատասխանաբար, Վրաստանի ԵՄ անդամակցության գործընթացը փաստացի փակուղի է մտել, քանի դեռ իշխանությունները չեն ցուցաբերել կուրսը փոխելու և ԵՄ ինտեգրման ուղուն վերադառնալու վճռական հանձնառություն», – ասվում է փաստաթղթում։

Խորհուրդը կոչ է անում վրացական իշխանություններին՝

-Ազատ արձակել բոլոր անօրինական կերպով կալանավորված քաղաքական գործիչներին, լրագրողներին և ակտիվիստներին։

-Չեղարկել բռնաճնշող օրենսդրությունը։

-Իրականացնել ժողովրդավարական, համապարփակ և կայուն բարեփոխումներ՝ համապատասխան եվրոպական ինտեգրման հիմնական սկզբունքներին։

-Դադարեցնել ԵՄ-ի, դեսպանների և առաքելությունների ղեկավարների դեմ ագրեսիվ նարատիվների օգտագործումը՝ որպես ԵՄ ներգրավվածությունը վերականգնելու առաջին քայլեր։

ԵՄ խորհուրդը վերահաստատում է իր աջակցությունը Վրաստանի ինքնիշխանությանը, անկախությանը և տարածքային ամբողջականությանը միջազգայնորեն ճանաչված սահմանների շրջանակներում և ընդգծում է իր ամուր հանձնառությունը հակամարտությունների խաղաղ կարգավորմանը և չճանաչման ու ներգրավվածության քաղաքականությանը, այդ թվում՝ Վրաստանում ԵՄ մոնիթորինգային առաքելության աշխատանքի միջոցով։

Խորհուրդը շարունակում է ակնկալել, որ Վրաստանը կուժեղացնի իր ջանքերը՝ լիովին համապատասխանելու ԵՄ ընդհանուր արտաքին և անվտանգության քաղաքականությանը, մասնավորապես՝ Ռուսաստանի և Բելառուսի դեմ ԵՄ սահմանափակող միջոցառումներին։

Նաև կոչ է արվում Վրաստանի իշխանություններին զերծ մնալ գործողություններից և հայտարարություններից, որոնք հակասում են ԵՄ արտաքին քաղաքականության դիրքորոշմանը, և շարունակել համագործակցությունը՝ ԵՄ սահմանափակող միջոցառումների շրջանցումը կանխելու համար։

Թարգմանությունը `Էմմա Չոբանյանի