Ըստ մեղադրանքի՝ Սարգսյանը ՊՆ աշխատակցին առաջարկել է ձևականորեն հողատարածք գնել և թանկ վերավաճառել․ ՏԵՍԱՆՅՈՒԹ

Հայաստանի երրորդ նախագահ Սերժ Սարգսյանի և մյուսների գործով դատական նիստին այսօր հանրային մեղադրող Գորիկ Հոմակիմյանը հանդես եկավ բացման խոսքով և ընթերցեց Իսակովի պողոտայի հողատարածքների վաճառքի գործով անցնող մեղադրյալ Վալերի Գրիգորյանի մեղադրանքը:

Ըստ մեղադրանքի՝ Վալերի Նարիմանի Գրիգորյանը, 2003-2009 թվականներին զբաղեցնելով ՀՀ պաշտպանության նախարարության 4-րդ բանակային կորպուսի հրամանատարի պաշտոնը, մտերիմ փոխհարաբերությունների մեջ գտնվելով ՀՀ պաշտպանության նախարարի պաշտոնը զբաղեցրած Սերժ Սարգսյանի և նույն նախարարության պաշտոնատար այլ անձանց հետ, 2005 թվականի ընթացքում դիմել է Սարգսյանին և խնդրել է բնակարանի վերանորոգման ծախսերը հոգալու համար իրեն ֆինանսապես աջակցեություն տրամադրել:

Վերոգրյալի հիման վրա, Սերժ Սարգսյանը, Վալերի Գրիգորյանին առաջարկել է ձևականորեն գնել նախարարությանն անհատույց (մշտական) օգտագործման իրավունքով տրամադրված Մալաթիա-Սեբաստիա համայնքում, «Եռաբլուր» զինվորական պանթեոնին հարակից տարածքում՝ Ծովակալ Իսակովի պողոտա 22 հասցեում գտնվող 1,194 հա մակերեսով բնակավայրերի նպատակային նշանակության, գիտաարտադրական կայանի կառուցման համար նախատեսված հողատարածքը և թանկ արժեքով վերավաճառել այն:

Միևնույն ժամանակ, ըստ մեղադրանքի, Սարգսյանը Վալերի Գրիգորյանին խոստացել է հիշյալ հողամասը վաճառել շուկայական արժեքից անհամեմատ էժան գնով:

Վալերի Գրիգորյանն ընդունել է Սերժ Սարգսյանի առաջարկը և պատրաստակամություն է հայտնել որպես գնորդ մասնակցել հիշյալ գույքի առուվաճառքի հետ կապված գործարքներին:

Այնուհետև Սերժ Սարգսյանը հողամասն ուղղակի վաճառքի ձևով օտարելու հիմքերի բացակայության պայմաններում, առանձնապես խոշոր չափերով վատնում կատարելու դիտավորությամբ, ՀՀ ՊՆ կապիտալ շինարարության և զորքերի բնակավորման վարչության պետի պաշտոնը զբաղեցրած Արմեն Սարգսյանին հանձնարարել է նախարարությանն անհատույց (մշտական) օգտագործման իրավունքով տրամադրված «Եռաբլուր» զինվորական պանթեոնին հարակից տարածքում գտնվող 0,2092 հա մակերեսով բնակավայրերի նպատակային նշանակության, հանգստի գոտու և քաղաքային այգու հիմնադրման համար օգտագործման նպատակային նշանակությամբ հողատարածքը Վալերի Գրիգորյանին օտարելու վերաբերյալ առուվաճառքի պայմանագրի նախագիծը:

Ըստ մեղադրանքի՝ Սերժ Սարգսյանի հանձնարարության և Արմեն Սարգսյանի կարգադրության հիման վրա 2005 թվականի մայիսի 2-ին Արսեն Պապյանը հիշյալ առուվաճառքի պայմանագրի նախագիծը, արդեն իսկ պաշտպանության նախարարի կողմից ստորագրված վիճակում ներկայացրել է նոտարական վավերացման, և նույն օրը ՀՀ պաշտպանության նախարար Սերժ Սարգսյանի և Վալերի Գրիգորյանի միջև կնքվել է անշարժ գույքի առուվաճառքի պայմանագիր, որով առանձնապես խոշոր չափերով՝ 95.680.000 դրամ ընդհանուր շուկայական արժեքով հողամասը անհամեմատ էժան գնով՝ ընդամենը 18.828.000 դրամով ուղղակի վաճառքով վաճառվել է Վալերի Գրիգորյանին, որից հետո հիշյալ անշարժ գույքն անշարժ գույքի պետական կոմիտեում որպես սեփականություն գրանցվել է Վալերի Գրիգորյանի անվամբ և ներառվել է վերջինիս գույքային ֆոնդում:

Այնուհետև, Վալերի Գրիգորյանի անվամբ որպես սեփականություն հաշվառված հիշյալ անշարժ գույքը շուրջ 2 ամիս հետո՝ 2005 թվականի հուլիսի 20-ին կնքված առուվաճառքի պայմանագրով 96.800.000 դրամով «Բարս» ընկերության աշխատակիցների միջնորդությամբ վաճառվել է ԱՄՆ քաղաքացի հանդիսացող Նարեգ Հարթունյանին, որի արդյունքում Վալերի Գրիգորյանը ստացել է նյութական օգուտ:

Այսպիսով, ըստ մեղադրանքի, Վալերի Գրիգորյանը, վերոգրյալ գործողություններով խոչընդոտներ վերացնելու եղանակով պաշտոնատար անձ հանդիսացած Սերժ Սարգսյանին օժանդակել է վատնման եղանակով կատարել առանձնապես խոշոր չափերով գույքի հափշտակություն, որի հետևանքով ՀՀ պաշտպանության նախարարությունը զրկվել է առավել շահավետ պայմաններով գույքն օտարելու հնարավորությունից, և ՀՀ-ին պատճառվել է 76.852.000 դրամի վնաս:

Արաքս Մամուլյան