Թուրքիայի տրանսպորտի նախարարը «Զանգեզուրի միջանցքից» է խոսել

Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն երկրի Ազգային Մեծ ժողովում խոսել է Թուրքիայի աշխարհաքաղաքական կարևորության մասին՝ հայտարարելով, որ երկրի ռազմավարական դիրքը Աֆրո-Եվրասիական աշխարհագրության սրտում այն ​​դարձնում է լոգիստիկ աշխարհի անվիճելի բնական կենտրոն։ Ըստ նրա՝ այսօր Թուրքիան միայն իր աշխարհագրական դիրքով սահմանելն այլևս բավարար չէ, քանի որ այն դարձել է «խաղաղության և անվտանգության աշխարհագրական ռազմավարական կղզի»՝ իր ենթակառուցվածքային նախաձեռնություններով, ճգնաժամերի լուծման հնարավորություններով, կառուցողական դիվանագիտությամբ և վստահության կառուցման մոտեցմամբ։

«Հետևաբար, մենք այլևս պարզապես չենք ասում՝ առանց Թուրքիայի միջանցք չի կարող լինել, մենք նաև ասում ենք՝ առանց Թուրքիայի անվտանգություն և կայունություն չի կարող լինել»,- ասել է Ուրալօղլուն։

Միաժամանակ, թուրք պաշտոոնյան կրկին, այսպես կոչված, «Զանգեզուրի միջանցք» եզրույթն է կիրառել։

«Զանգեզուրի միջանցքի կարևոր մաս կազմող Կարս-Իգդիր-Դիլուջու գծի ավարտով մենք ստեղծում ենք նոր ռազմավարական խորություն, որը Միջին  միջանցքը կկապի մեր երկրի հետ երկու առանձին սահմանային անցակետերի միջոցով»,- հայտարարել է Ուրալօղլուն։

Նա հավելել է, որ «Զարգացման երթուղու նախագիծը» Թուրքիայի լոգիստիկ հզորությունը կհասցնի գագաթնակետին, այն բոլորովին նոր առևտրային միջանցք է, որը կսկսվի Պարսից ծոցից և Թուրքիայի միջոցով կհասնի Եվրոպա։

Ըստ նրա՝ սա Թուրքիայի աշխարհաքաղաքական առավելությունը կվերածի տնտեսական ուժի։

«Թուրքիան ոչ միայն կամուրջ-երկիր է, որի միջով ապրանքներ են անցնում, այլև խոշոր երկիր, որը գծագրում և որոշում է առևտրի ուղիները»,- ասել է թուրք նախարարը։

Թարգմանությունը՝ Էմմա Չոբանյանի