ՀՀԿ-ից ՔՊ-ի ցուցակում կլինի նաև Ֆելիքս Ցոլակյանը. թեժ քարոզարշավ է սպասվում՝ սևի և սպիտակի հայտնի բաժանումով

Արտակարգ իրավիճակների նախարար Ֆելիքս Ցոլակյանն առաջադրվելու է «Քաղաքացիական պայմանագիր» կուսակցության ռեյտինգային ցուցակում: Նա առաջադրվելու է թիվ 11 ընտրատարածքից՝ Շիրակի մարզից:

Ի դեպ, Շիրակի գյուղերում Ցոլակյանը բավականին մեծ ռեյտինգ ունի: Սակայն, ՔՊ-ականները ողբերգական են համարում Գյումրու վիճակը: Այս տեղեկությունը Factor.am-ին մասնավոր զրույցում փոխանցեց «Քաղաքացիական պայմանագիր» կուսակցության վարչության անդամներից մեկը:

Ըստ նրա՝ Ցոլակյանը ՔՊ-ի ցուցակում ընդգրկվող այն ՀՀԿ-ականներից մեկն է, որոնց մասին վարչապետի առաջին ընտրության օրը՝ հոկտեմբերի 24-ին, լրագրողների հետ զրույցում Ազգային ժողովում ասել էր Նիկոլ Փաշինյանը:

Ֆելիքս Ցոլակյանը Factor.am-ի հետ զրույցում փոխանցեց, որ իր առաջադրվելու հանգամանքը քննարկելու հարց է: Սակայն այս պահին քննարկում չի եղել:

Ի դեպ, Factor.am-ն արդեն գրել է, որ ՔՊ-ի ցուցակում է լինելու ՀՀԿ խմբակցության պատգամավոր Շիրակ Թորոսյանը, որը հայտարարել է ՀՀԿ-ի հետ համագործակցության դադարեցման մասին: Նա տեղեկությունը մեզ հետ զրույցում հաստատել էր:

ՔՊ-ի մեր աղբյուրը հավաստիացրեց, որ ՀՀԿ-ից ուրիշ դեմքեր չեն լինելու, որպեսզի մեծ աղմուկ չբարձրանա: Մեղմ ասած՝ Հունան Պողոսյանի նշանակման արձագանքն աչքերի առջև է դեռ:

Անդրադառնալով ռեյտինգային թեկնածուներին՝ նշենք, որ պատգամավոր Ալեն Սիմոնյանն առաջադրվելու է Կենտրոն և Էրեբունի վարչական շրջաններում, առաջին փոխվարչապետ Արարատ Միրզոյանը և կրթության ու գիտության նախարար Արայիկ Հարությունյանը՝ Մալաթիա-Սեբաստիա և Աջափնյակ վարչական շրջաններում:

Կուսակցությունում մտածում են Ավան, Արաբկիր վարչական շրջաններում ուժեղ թեկնածու առաջադրելու մասին: Նրանք խոստովանում են, որ այս համայնքներում թույլ են: ՔՊ-ի հույսը Շիրակում Ցոլակյանն է, Կոտայքում՝ կուսակցության նախագահ Սասուն Միքայելյանը:

«Քաղաքացիական պայմանագիր» կուսակցության մեր զրուցակիցը չհերքեց, որ հանրապետության մասշտաբով ռեյտինգային թեկնածուների խնդիր ունեն: Ուստի օգտագործելու են Նիկոլ Փաշինյանի հեղինակությունը:

Հայկ Վարդանյան