Թուրքիան մտահոգված է Սև ծովում տանկերների վրա հարձակումներով

Թուրքիայի արտաքին գործերի նախարարությունը մտահոգություն է հայտնել վերջին օրերին Սև ծովում տեղի ունեցած նավթատար տանկերների վրա հարձակումների կապակցությամբ։ Նախարարության պաշտոնական ներկայացուցիչ Օնջյու Քեչելիի՝ նոյեմբերի 30-ին հրապարակված հայտարարությունում նշվում է, որ Գամբիայով շարժվող Kairos և Virat տանկերների վրա հարձակումները սպառնալիք են ստեղծել տարածաշրջանում նավիգացիայի անվտանգության համար, փոխանցում է DW-ն։

«Այս միջադեպերը, որոնք տեղի են ունեցել Սև ծովում մեր բացառիկ տնտեսական գոտու սահմաններում, լուրջ ռիսկեր են ստեղծել նավագնացության, կյանքի, գույքի և շրջակա միջավայրի անվտանգության համար»,-հայտարարել է Քեչելին։

Ուկրաինան, որը պատասխանատվություն է վերցրել հարձակումների համար, հայտարարությունում ուղիղ չի դատապարտվում։ Թուրքիան «շարունակում է կապ պահպանել շահագրգիռ կողմերի հետ», որպեսզի «կանխի պատերազմի տարածումը» Սև ծովում և «խուսափի երկրի տնտեսական շահերի վրա բացասական ազդեցությունից», նշել է ԱԳՆ ներկայացուցիչը։

Kairos և Virat տանկերները, որոնք դասվում են Ռուսաստանի «ստվերային նավատորմին», հարձակման են ենթարկվել նոյեմբերի 28-ի երեկոյան, երբ գտնվում էին Թուրքիայի ափերի մոտ ծովում։ Ուկրաինական լրատվամիջոցների աղբյուրների տվյալներով՝ դրանք խոցվել են Ուկրաինայի անվտանգության ծառայության ծովային դրոններով։ Հարձակումը տեղի է ունեցել այն ժամանակ, երբ տանկերները առանց բեռի շարժվում էին Նովոռոսիսկի նավահանգիստ։

Երկու տանկերներն էլ գտնվում են արևմտյան երկրների սանկցիաների տակ՝ ռուսական նավթի փոխադրման գործընթացներին մասնակցելու համար։