«Լա՞վ կլինի՝ մարդիկ գնան Էջմիածին և պատարագը խանգարեն»․ ինչո՞ւ «քեռակին ունեցողներ» վանկարկողներին չհեռացրին եկեղեցու տարածքից

«Հիմա լա՞վ կլինի՝ մարդիկ գնան, օրինակ, Էջմիածին և պատարագը խանգարեն՝ իրենց անհամաձայնությունը հայտնելով երկրում տեղի ունեցող տարբեր բաների»,-այսպես արձագանքեց ԱԺ պատգամավոր Արման Եղոյանը՝ Հովհաննես Իշխանյանին և Հայկ Դորունցին Սուրբ Սարգիս եղեկեցու բակից հեռացնելու վերաբերյալ Factor TV-ի լրագրողի հարցին։

Հիշեցնենք՝ պատարագիչ քահանան չհնչեցրեց Գարեգին Բ կաթողիկոսի անունը, ինչին էլ ի պատասխան Իշխանյանը սկսեց վանկարկել այն։ Դրանից հետո նրան և Հայկ Դորունցին ոստիկանները եկեղեցուց ուժով դուրս բերեցին։

Հարցին՝ ինչպես է ստացվել, որ միայն այս 2 քաղաքացիներին են հեռացրել եկեղեցու բակից, իսկ «քեռակին ունեցողներ» վանկարկողները շարունակել են մնալ եկեղեցու տարածքում, Եղոյանը պատասխանեց․

«Ամեն դեպքում, երբ վեճը սկսողին հանում են, վեճը դադարում է։ Այսինքն՝ այդ քաղաքացիները չեն եկել վիճելու, նրանք եկել են պատարագի մասնակցելու։ Այդտեղ տեսաք՝ քանի քաղաքացիների հետ հարցազրույց էիք անում։ Թող դուրս գան, իրենց կարծիքը ասեն։ Հիմա պատկերացնու՞մ եք՝ այս բոլոր քաղաքացիները գնան Էջմիածնի պատարագին և իրենց կարծիքը արտահայտեն։ Պատկերացնու՞մ եք դուք դա»,-նշեց նա։

Factor TV-ի հարցին ի պատասխան ՆԳՆ-ից ավելի վաղ հայտնել են, որ երկու անձ հեռացվել է Սուրբ Սարգիս եկեղեցու բակից՝ միջադեպի կանխման և անվտանգության ապահովման նկատառմամբ․ «Ձերբակալվածներ չկան»։

Ակտիվիստներին ոստիկանական մեքենաներով հեռացրել են եկեղեցու տարածքից ու ազատ արձակել։

Տեսանյութը՝ այստեղ։

Եվգենյա Համբարձումյան