Արշակ արքեպիսկոպոս Խաչատրյանի հարցի քննության համար կձևավորվի նոր հանձնախումբ

Արշակ արքեպիսկոպոս Խաչատրյանի հարցի քննության համար կձևավորվի նոր հանձնախումբ, որը կքննարկի նաև Սրբազանի ծառայության առժամյա կասեցման հարցը մինչ հանձնաժողովի աշխատանքների ավարտը։ Այս մասին հայտարարություն է տարածել Մայր Աթոռը։

«Նոյեմբերի 24-ին հանձախմբի ատենապետ Տ․ Խաժակ արք․ Պարսամյանը, հաշվի առնելով առկա հանձնախմբի արդյունավետ աշխատելու դժվարությունները, գրություն է ուղղել Վեհափառ Հայրապետին՝ առաջարկելով հարցի արդար քննության իրականացման համար ձևավորել երեք անձից կազմված նոր հանձնախումբ, որը կարող է նաև քննարկել Սրբազանի ծառայության առժամյա կասեցման հարցը մինչ հանձնաժողովի աշխատանքների ավարտը։ Նոր հանձնախմբի առաջարկի վերաբերյալ նոյեմբերի 25-ին իրազեկվել են և համաձայնություն տվել գործող հանձնախմբի անդամները»,- ասված է Մայր Աթոռի տարածած հաղորդագրությունում։

Հիշեցնենք, որ Կաթողիկոսի կողմից ստեղծվել էր հանձնախումբ՝ «Համացանցում տարածված Գերշ․ Տ․ Արշակ արքեպս․ Խաչատրյանին վերագրվող անպարկեշտ տեսանյութերն ուսումնասիրելու և դրանց առնչությամբ եզրակացություն ներկայացնելու նպատակով»։ Նշվում է, որ նոյեմբերի 25-ին ՔԿ-ի կողմից հանձնախմբի անդամներից մեկին են տրամադրվել հիշյալ փորձաքննության արդյունքները, որոնք հաստատում են Արշակ արքեպիսկոպոս Խաչատրյանին վերագրվող տեսանյութերի իսկությունը։ Դատատեսաձայնագրային և դիմանկարային փորձաքննությունը հաստատել է՝ աղմկահարույց տեսանյութերում Արշակ արքեպիսկոպոս Խաչատրյանն է։ Այս մասին FactorTV-ի գրավոր հարցմանն ի պատասխան հայտնել են Քննչական կոմիտեից:

Նախօրեին եպիսկոպոսների և արքեպիսկոպոսների ստորագրությամբ հայտարարություն է հրապարակվել, որում անդրադարձ է կատարվում Արշակ արքեպիսկոպոս Խաչատրյանին վերագրվող տեսանյութին։ Ավելի ուշ լրագրողների հետ զրույցում դիվանապետը կասկածի տակ էր դրել շրջանառվող գրության վավերականությունը։