Հատուկ օպերացիայի արդյունքում կեղծ հիմնավորումներ են հավաքվել Նորք-Մարաշի զինված խմբի գործով․ Անդրիաս Ղուկասյան․ ՏԵՍԱՆՅՈՒԹ

Մենք ունեցել ենք հանցավոր իրավապահ համակարգ: Բանտում անձամբ ծանոթացել եմ բազմաթիվ մարդկանց հետ, ովքեր քաղաքական գործիչներ չէին, բայց շինծու մեղադրանքներով գտնվում էին այնտեղ՝ տարբեր շարժառիթներով: Իրավապահ համակարգը ձևական մեղադրանքներով պատիժներ է սահմանել նրանց նկատմամբ, և մարդիկ շարունակում են կրել իրենց պատիժը։

Այս մասին այսօր հրավիրված մամուլի ասուլիսի ժամանակ ասաց «Նոր Հայաստան» շարժման առաջնորդ Անդրիաս Ղուկասյանը՝ անդրադառնալով Ազգային ժողովում այսօր ընդունված Համաներման մասին օրենքին և կալանավայրերը բեռնաթափելու խնդրին։

«Համաներումը պետության կողմից բարի կամքի դրսևորում է: Պետք է գիտակցենք, որ սա պետության պարտավորությունը չէ: Այն աննախադեպ է ՀՀ պատմության մեջ, քանի որ նման ընդգրկունությամբ համաներում երբևէ չի եղել»,- ասաց նա:

Խոսելով Նորք-Մարաշի զինված խմբի մասին՝ Ղուկասյանն ասաց, որ հատուկ օպերացիայի արդյունքում կեղծ հիմնավորումներ են հավաքվել Նորք-Մարաշի զինված խմբի գործով, և դրանք կեղծ մեղադրանքներ են:

«Նրանց դեմ քրեական հետապնդումը շարունակվում է առանց հիմքի: Իմ դեպքում նույնպես քրեական գործը համաներումով չի կասեցվում, շարունակվելու է: Ես չեմ եղել  «Սասնա ծռերի» հանցակիցը, իսկ համաներումը տարածվում է նրանց ու իրենց հանցակից մարդկանց վրա: Ինձ ներկայացված շինծու մեղադրանքով հանցակից չեմ համարվում, դրա համար էլ գործը կես տարի է առանձնացված է և քննվում է առանձին վարույթուվ»,- ասաց «Նոր Հայաստան» շարժման առաջնորդը։

Մանրամասները՝ տեսանյութում։