Օրբանը հայտնել է, որ այսօր Մոսկվայում կհանդիպի Պուտինի հետ

Հունգարիայի վարչապետ Վիկտոր Օրբանը հայտարարել է, որ ուրբաթ Մոսկվայում կհանդիպի ՌԴ նախագահ Վլադիմիր Պուտինի հետ՝ քննարկելու նավթի և գազի մատակարարումները, ինչպես նաև Ուկրաինայում խաղաղապահ ջանքերը, հաղորդում է Reuters-ը։ Գործակալությունը հիշեցնում է, որ Օրբանը սերտ հարաբերություններ է պահպանում Մոսկվայի հետ՝ չնայած Ուկրաինայում պատերազմին: Հունգարիան շարունակում է մեծապես կախված լինել ռուսական էներգակիրներից՝ չնայած այդ կախվածությունը նվազեցնելու՝ ԵՄ-ի ջանքերին, գրում է BBC-ի ռուսական ծառայությունը:

«Ես գնում եմ՝ ապահովելու Հունգարիայի էներգամատակարարումն այս ձմռանը և հաջորդ տարի»,- Պուտինի հետ հանդիպման ծրագրերն է ներկայացրել Օրբանը։

Հարցին՝ արդյո՞ք խաղաղապահ ջանքերը նույնպես կլինեն հանդիպման օրակարգում, Օրբանը պատասխանել է. «Դժվար թե կարողանանք խուսափել դրանից»։

Նոյեմբերին ԱՄՆ-ը չեղարկել էր Հունգարիայի կողմից ռուսական նավթի և գազի օգտագործման հետ կապված պատժամիջոցները, այն բանից հետո, երբ Օրբանը Վաշինգտոնում նախագահ Դոնալդ Թրամփի հետ հանդիպման ժամանակ պնդել էր դրան հետաձգման հարցում։

Հունգարիան նաև միջուկային էներգիայի համագործակցության համաձայնագիր է ստորագրել ԱՄՆ-ի հետ։ Այն նախատեսում է, որ Հունգարիան կգնի ամերիկյան միջուկային վառելիք և աշխատած վառելիքի պահեստավորման տեխնոլոգիաներ Ռուսաստանի կողմից  կառուցված «Պակշ I» ատոմակայանի համար։ Ռուսաստանի «Ռոսատոմն» ընդլայնում է արտադրությունը կայանում։

Օրբանն ավելի վաղ հայտարարել էր, որ ցանկանում է վերակենդանացնել Բուդապեշտում Թրամփի և Պուտինի միջև Ուկրաինայի հարցով «խաղաղության գագաթնաժողովի» ծրագրերը, որոնք Թրամփը հետաձգել էր։

Ի տարբերություն ՆԱՏՕ-ի ու ԵՄ առաջնորդների մեծամասնության՝ Օրբանը պահպանել է ջերմ հարաբերություններ Ռուսաստանի հետ՝ միաժամանակ կասկածի տակ դնելով Արևմուտքի կողմից Կիևին տրամադրվող ռազմական օգնությունը։

Միաժամանակ, ՌԴ նախագահի խոսնակ Դմիտրի Պեսկովը ՏԱՍՍ-ի հետ զրույցում հաստատել է Պուտինի և Օրբանի հանդիպումը։

Նախօրեին Պուտինը, պատասխանելով Հունգարիայի վարչապետի՝ ուրբաթ հնարավոր այցի մասին հարցին, ասել էր, որ եթե Օրբանն ընդունի հրավերը, ուրախ կլինեն նրան տեսնել Մոսկայում։