Թրամփը հայտարարել է, որ ԱՄՆ-ը «մշտապես կդադարեցնի երրորդ աշխարհի երկրներից» միգրացիան

ԱՄՆ նախագահ Դոնալդ Թրամփը հայտարարել է, որ իր վարչակազմը կաշխատի «մշտապես դադարեցնել» «երրորդ աշխարհի բոլոր երկրներից» միգրացիան՝ համակարգին թույլ տալու համար լիովին վերականգնվել, գրում է Reuters-ը:

Թրամփը որևէ հստակ երկիր չի նշել կամ չի բացատրել, թե ինչ նկատի ունի՝ «երրորդ աշխարհի երկրներ» կամ «մշտապես դադարեցնել» ասելով։ Նա նշել է, որ ծրագիրը կներառի նախկին նախագահ Ջո Բայդենի վարչակազմի օրոք հաստատված դեպքերը։

«Ես ընդմիշտ կդադարեցնեմ միգրացիան երրորդ աշխարհի բոլոր երկրներից՝ թույլ տալով ԱՄՆ համակարգին լիովին վերականգնվել, կդադարեցնեմ Բայդենի միլիոնավոր անօրինական մուտքերը, այդ թվում՝ Քնկոտ Ջո Բայդենի Autopen-ով ստորագրվածները, և կհեռացնեմ բոլոր նրանց, ովքեր զուտ ակտիվ չեն Միացյալ Նահանգների համար»,- գրել է նա իր Truth Social սոցիալական ցանցում։

Թրամփը հայտարարել է, որ կդադարեցնի նաև «ոչ քաղաքացիների» համար նախատեսված բոլոր դաշնային արտոնություններն ու սուբսիդիաները, «քաղաքացիությունից կզրկի այն միգրանտներին, որոնք խաթարում են ներքին խաղաղությունը» և կարտաքսի ցանկացած օտարերկրյա քաղաքացու, որը կհամարվի հանրային բեռ, անվտանգության ռիսկ կամ «անհամատեղելի արևմտյան քաղաքակրթության հետ»։

Թրամփի մեկնաբանությունները հաջորդում են Վաշինգտոնում Ազգային գվարդիայի անդամի մահվանը, որին, ըստ քննիչների, վիրավորել են Սպիտակ տան մոտակայքում դարանակալման ժամանակ։ Միջադեպից հետո աֆղան տղամարդ է ձերբակալվել։

Ավելի վաղ, ԱՄՆ ներքին անվտանգության նախարարության պաշտոնյաները հայտարարել էին, որ Թրամփը հրամայել է վերանայել Բայդենի վարչակազմի կողմից հաստատված ապաստանի դիմումները և 19 երկրների քաղաքացիներին տրամադրված «Գրին քարտերը»։ BBC-ն հարցմանն էլ, թե որ երկրներն են ընդգրկված ցուցակում, ԱՄՆ Քաղաքացիության և ներգաղթի ծառայությունները հղում են արել Դոնալդ Թրամփի հունիսյան գործադիր հրամանագրին, որով նա արգելել է Ասիայի, Աֆրիկայի և Լատինական Ամերիկայի 12 երկրների քաղաքացիների մուտքը ԱՄՆ և սահմանափակել ևս յոթ երկրների քաղաքացիների մուտքը։

ԱՄՆ քաղաքացիության և ներգաղթի ծառայությունները չորեքշաբթի օրը անորոշ ժամանակով դադարեցրել են Աֆղանստանի քաղաքացիներին վերաբերող բոլոր ներգաղթային հարցումների մշակումը։

Թարգմանությունը՝ Էմմա Չոբանյանի