«Վայրկյանաչափ ենք պահել, ծուխ ենք փորձարկել․ դա գործի դրվագներից մեկն է»․ Լիդիա Մանթաշյան․ ՏԵՍԱՆՅՈՒԹ

«Անկեղծ շատ հուզված եմ, որ մեր արժանապատիվ ժողովուրդը ընդվզեց այդ ամեն ինչին, տեսնելով, այնքան ակնհայտ է, որ այստեղ ահաբեկչություն չկա, այնքան ակնհայտ է, որ ապօրինի մեզ պատժի են ենթարկում»,- այս մասին լրագրողների հետ զրույցում հայտարարեց Բագրատ արքեպիսկոպոս Գալստանյանի և մյուսների գործով ամբաստանյալ Լիդիա Մանթաշյանը։

«Սա խափանման միջոց չէր, սա պատժի ձև էր, որ ապօրինի պատժում են մեզ մեր քաղաքական հայացքների համար, նույնիսկ քրեական գործի մեջ գրել էին, առաջին դատական նիստին քննիչն ասեց, ասում է՝ Լիդիա Մանթաշյանը գաղափարական թշնամանք ունի գործող իշխանությունների հետ, այդ պատճառով խնդրում ենք, ասենք, իրեն տանել երկու ամիս կալանքի։ Դատական նիստի ժամանակ է նույնիսկ դա շեշտվել, հետո հասկացան, որ իրենց դեմ է աշխատում դա, սկսեցին այդ ձևակերպումը չօգտագործել, բայց քրեական գործի մեջ գրված է դա, որ ես գաղափարական թշնամանք ունեմ այս իշխանությունների հետ»,-նշեց նա։

Մանթաշյանի խոսքով՝ քրեական գործը «լրիվ ջուր է»։

«Ծուխ ենք փորձարկել Շարբաթյան Մովսեսի հետ։ Այն ծխերից, որը որ մենք օգտագործել ենք հանրահավաքների ժամանակ։ Փորձել ենք հասկանանք, այդ նոր ծուխը, որ բերել են, ինքը ինչքա՞ն վայրկյան է պահում, հա՞, վայրկյանաչափ պահել ենք, ծուխ ենք փորձարկել։ Դա գործի  դրվագներից մեկն է։ Իմ նոթատետրի գրառումներն են գրել, որտեղ, ասենք, շատ անձնական բաներ կան, իմ մտորումներն են գրած»,-նշեց նա։

Մանրամասները՝ տեսանյութում։