19.08.2026 | 10:49
Սուրեն Պապիկյանը ՊՆ զորամասերում անակնկալ ստուգայցեր է իրականացնում
Ինչ է սպասվում 200 ժամից ավելի բացակայած աշակերտներին․ նոր փոփոխություններ են առաջարկվում
Հասարակություն
27.11.2025 | 16:24
ԿԳՄՍ նախարարությունը հանրային քննարկման է ներկայացրել նախագիծ, որով անդրադարձ է կատարվում նույն դասարանում մնացած, բացակայող, ինչպես նաև՝ գովասանագրի արժանի աշակերտներին։
Ով կմնա նույն դասարանում
Եթե աշակերտը տարվա ընթացքում որևէ առարկայից ստացել է շատ ցածր գնահատական (1-3 միավոր), նա պետք է վերաքննություն հանձնի։
Եթե վերաքննությունից հետո առնվազն երկու առարկայից նորից ցածր գնահատական (1-3 միավոր) ստանա, ապա կմնա նույն դասարանում։
Եթե աշակերտը կրթական մակարդակի (օրինակ՝ 9-րդ կամ 12-րդ դասարանի) ավարտին քննություններից և դրանց հաջորդող վերաքննություններից հետո առնվազն երկու առարկայից ստանում է 7-ից ցածր գնահատական (20 միավորանոց սանդղակով), ապա կկրկնի ուսումնական տարին։
Ինչ կլինի շատ բացակայող աշակերտի հետ
Եթե աշակերտը տարվա ընթացքում բացակայել է 200 ժամից ավելի, նա ստիպված կլինի բոլոր առարկաներից լրացուցիչ գրավոր քննություններ հանձնել։
Այդ քննությունների արդյունքներով օգոստոսի 20-ից 30-ն ընկած ժամանակահատվածում կորոշվի՝ նա կփոխադրվի հաջորդ դասարան, թե՞ կմնա նույն դասարանում։
Եթե աշակերտը չներկայանա քննություններին կամ դրանց արդյունքում առնվազն երկու առարկայից ցածր (1-7 միավոր) գնահատական ստանա, նա կկրկնի դասընթացը։
Ինչպես կտրվեն գովասանագրերը
Նախագծով նախատեսվում է հստակեցնել, թե ինչ չափանիշների դեպքում են աշակերտները ստանում գովասանագրեր։
Այսպիսով, այն դասարաններում, որտեղ թվանշանային գնահատականներ չեն նշանակվում (օրինակ՝ տարրական դասարաններում), գովասանագիր կստանա այն աշակերտը, ում տարեկան բնութագիրը առնվազն 70% կլինի «A» (գերազանց) մակարդակի և առավելագույնը 30%՝ «B» (լավ) մակարդակի։
Եվգենյա Համբարձումյան
