Դատարանը հեռացավ առանձին սենյակ՝ «Խնձորի գործով» դատական ակտ կայացնելու

Վերաքննիչ քրեական դատարանն այսօր հեռացավ առանձի սենյակ՝ արցախից բռնի տեղահանված Ալբերտ Առստամյանի գործով դատական ակտ կայացնելու։ Նշենք, որ այսօր, ժամը 11։00-ին նշանակված դատական նիստի ընթացքում նախատեսվում էր, որ պաշտպանական կողմը հանդես կգա Առստամյանի արդարացման դատական ակտի դեմ Դատախազության բողոքի պատասխանով, սակայն պաշտպան Ռոման Երիցյանը նիստին չէր ներկայացել և Առստամյանին էլ հայտնել էր, որ կարող է չներկայանալ։

Դատարանը որոշեց ընդմիջել նիստն ու Առստամյանին առաջարկել ներկայանալ դատարան և իրացնել իր իրավունքը, սակայն Առստամյանը հայտնեց, որ առանց պաշտպանի չի ցանկանում ներկայանալ։ Ընդմիջման ավարտից հետո, երբ նիստը վերսկսվեց, ո՛չ Առստամյանը, ո՛չ պաշտանը չէին ներկայացել։ Դատարանն արձանագրեց, որ պաշտպանական կողմն ինքն իրեն զրկել է բողոքի պատասխան ներկայացնելու հնարավորությունից, որոշեց շարունակել գործի քննությունը միայն հանրային մեղադրողի մասնակցությամբ։ Միաժամանակ, նախագահող դատավորը պարզաբանեց, որ նախկինում այս գործով նիստերը հետաձգվել են, որպեսզի պաշտպանական կողմը բողոքի պատասխան ներկայացնի, այսօրվա նիստն էլ համաձայնեցված է եղել պաշտպան Ռոման Երիցյանի հետ։

Այսպիսով՝ դատարանն անցավ դատավարության մյուս փուլերին, և ավարտելով գործի քննությունը՝ հեռացավ առանձին սենյակ՝ որոշում կայացնելու։

Հիշեցնենք, որ 72-ամյա Ալբերտ Առստամյանը մեղադրվում է խուլիգանության համար։ Նա, ըստ գործի, տեսնելով վարչապետ Նիկոլ Փաշինյանին, 9-րդ հարկի տան պատշգամբից խնձոր է նետել Փաշինյանի ուղղությամբ ու հայհոյանքներ հնչեցրել։

Այս արարքով, ըստ մեղադրանքի կողմի, Առստամյանը բացահայտ անհարգալից վերաբերմունք է դրսևորել հասարակության նկատմամբ, խաթարել հասարակության անդորրը։ Մինչդեռ Առստամյանը հայտարարել է, որ ինքը քաղաքական ակցիա է իրականացրել և միտում չի ունեցել վնասելու որևէ մեկին։

Առաջին ատյանի դատարանի դատավոր Արման Հովհաննիսյանն արդարացրել է Առստամյանին՝ համարելով, որ նրա արարքում առկա չէ խուլիգանության հանցակազմ, բայց դատախազությունը բողոքարկել է դատական ակտը։

Արաքս Մամուլյան