Ղրիմի կամրջի պայթյունի գործով ութ մեղադրյալները, այդ թվում՝ ՀՀ քաղաքացիները, դատապարտվել են ցմահ ազատազրկման

Դոնի Ռոստովի Հարավային շրջանի ռազմական դատարանը Ղրիմի կամրջի պայթյունի գործով բոլոր ութ մեղադրյալներին դատապարտել է ցմահ ազատազրկման, հաղորդում է Mediazona-ի թղթակիցը։ Նրանք մեղավոր են ճանաչվել ահաբեկչության և պայթուցիկ նյութեր տեղափոխելու հոդվածներով, փոխանցում է The Insider-ը։

Գործով մեղադրվում է, ընդհանուր առմամբ, 13 անձ՝ Ռուսաստանի, Հայաստանի և Ուկրաինայի քաղաքացիներ։ Նրանցից ութը ձերբակալված են՝ Արտյոմ Ազատյանը, Գեորգի Ազատյանը, Օլեգ Անտիպովը, Ալեքսանդր Բիլինը, Վլադիմիր Զլոբան, Դմիտրի Տյաժելիխը, Ռոման Սոլոմկոն և Արթուր Տերչանյանը։ Բոլորին մեղադրանք է առաջադրվել ահաբեկչական գործողության (205-րդ հոդվածի 3-րդ մասի «բ» ենթակետ) և պայթուցիկ նյութերի փոխադրման (222.1-րդ հոդվածի 4-րդ մաս) համար։ Սոլոմկոյին և Տերչանյանին մեղադրանք է առաջադրվել նաև պայթուցիկ նյութերի մաքսանենգության համար (226.1-րդ հոդվածի 3-րդ մաս)։

Ավելի վաղ եզրափակիչ ելույթների ժամանակ պետական ​​մեղադրողը ցմահ ազատազրկում էր պահանջել բոլոր ութ մեղադրյալների, այդ թվում՝ ՀՀ քաղաքացիների համար։

Քննության տվյալներով՝ վեց ձեռնարկատերեր, մեկ ֆերմեր և բեռնատարի մեկ վարորդ դավադրություն են կազմակերպել Ուկրաինայի հետախուզական գործակալությունների հետ՝ 2022 թվականի հոկտեմբերի 8-ին Ղրիմի կամրջի վրա պայթուցիկներով բեռնված բեռնատարը պայթեցնելու համար։ Կամուրջն այդ ժամանակ լուրջ վնաս էր կրել և հինգ զոհի պատճառ դարձել։ Մեղադրյալներն իրենց մեղքը չեն ընդունել։ Նրանք պնդում են, որ տեղյակ չեն եղել բեռի մեջ եղած պայթուցիկների մասին։

Պայթյունից մեկ տարի անց Ուկրաինայի Անվտանգության ծառայության ղեկավար Վասիլ Մալյուկը պատմել էր, թե ինչպես է նախապատրաստվել գործողությունը։ Նա ասել էր, որ 21 տոննա պայթուցիկ նյութ է թաքցված եղել մետաղական բալոնների մեջ, որոնք այնուհետև տեղադրվել են մեծ գլանափաթեթների մեջ։ Բեռը թվացել է «լիովին քաղաքացիական»։ Գործողությունը ծրագրել են ծառայության երեք աշխատակիցներ, այդ թվում՝ Մալյուկը։

Թարգմանությունը՝ Էմմա Չոբանյանի