Ղրիմի կամրջի պայթյունի գործով բոլոր մեղադրյալների համար ցմահ ազատազրկում են պահանջում․ նրանց թվում ՀՀ քաղաքացիներ կան

ՌԴ Դոնի Ռոստովի Հարավային շրջանի զինվորական դատարանում եզրափակիչ ելույթների ժամանակ պետական ​​մեղադրողը ցմահ ազատազրկում է պահանջել 2022 թվականի հոկտեմբերին Ղրիմի կամրջի պայթյունի գործով բոլոր ութ մեղադրյալների համար, փոխանցում է Meduza-ն։

Դատավարությունը սկսվել է փետրվարին։ Այն  ընթանում է փակ դռների հետևում՝ առանց լրատվամիջոցների ներկայության։ Պաշտպանական կողմն իր եզրափակիչ ելույթները կներկայացնի հոկտեմբերի 30-ին։

Գործով անցնում է, ընդհանուր առմամբ, 13 մեղադրյալ՝ Ռուսաստանի, Հայաստանի և Ուկրաինայի քաղաքացիներ։ Նրանցից ութը կալանավորված են։ Մեղադրյալներ Արտյոմ Ազատյանը, Գեորգի Ազատյանը, Օլեգ Անտիպովը, Ալեքսանդր Բիլինը, Վլադիմիր Զլոբը, Դմիտրի Տյաժոլիխը, Ռոման Սոլոմկոն և Արթուր Տերչանյանը մեղադրվում են ահաբեկչական գործողություն կատարելու (205-րդ հոդվածի 3-րդ մասի «բ» կետ) և զենքի անօրինական շրջանառության (222.1-րդ հոդվածի 4-րդ մաս) մեջ։

Սոլոմկոն և Տերչանյանը կասկածվում են նաև պայթուցիկ նյութերի մաքսանենգության մեջ (226.1-րդ հոդվածի 3-րդ մասի 3-րդ կետ)։ Քննությունն ահաբեկչական հարձակման կազմակերպիչ է համարում Ուկրաինայի անվտանգության ծառայության ղեկավար Վասիլ Մալյուկին։

Մեղադրյալները չեն ընդունել առաջադրված մեղադրանքները։ BBC-ի ռուսական ծառայությունը, հղում անելով փաստաբաններին, գրել էր, որ գործով մեղադրյալներն «պատահական անհատներ են, որոնք սխալ ժամանակ սխալ տեղում են հայտնվել»:

Ռուս-ուկրաինական լայնածավալ պատերազմի սկսվելուց ի վեր Ղրիմի կամուրջը, որը կառուցվել է Կերչի նեղուցի վրայով՝ Ռուսաստանի կողմից թերակղզու բռնակցումից հետո, երկու անգամ ենթարկվել է հարձակման։ 2022 թվականի հոկտեմբերին կամրջի վրա պայթուցիկներով բեռնված բեռնատար էր պայթել՝ փլուզելով ճանապարհի մի քանի հատվածներ։ Բեռնատարի վարորդը և մոտակայքում գտնվող մեքենայից ևս չորս մարդ զոհվել էին։

2023 թվականի հուլիսին էլ կամուրջը հարձակման էր ենթարկվել ռազմածովային անօդաչու թռչող սարքերի կողմից, որի հետևանքով զոհվել էր Բելգորոդի մարզից մի զույգ, մեքենայում գտնվող նրանց 14-ամյա դուստրը վիրավորվել էր։ Երկու հարձակումներից հետո կամրջի երթևեկությունը դադարեցվել էր վերանորոգման համար։

Ղրիմի կամրջի վրա տեղի ունեցած երկու պայթյունների կազմակերպման պատասխանատվությունն էլ ստանձնել է Ուկրաինայի Անվտանգության ծառայությունը։

Թարգմանությունը՝ Էմմա Չոբանյանի