29.07.2026 | 15:30
Տոկիոյի Օլիմպիական խաղերի մասնակիցն անհետ կորել է Բրազիլիայում
ԱՄՆ-ը ցանկանում է Ուկրաինային անվտանգության երաշխիքներ տրամադրել միայն խաղաղության համաձայնագրի կնքումից հետո․ Politico
Քաղաքականություն
27.11.2025 | 15:37
ԱՄՆ պետքարտուղար Մարկո Ռուբիոն եվրոպացի դաշնակիցներին ասել է, որ Վաշինգտոնը կհամաձայնի Ուկրաինային որևէ անվտանգության երաշխիք տրամադրել միայն խաղաղության համաձայնագրի կնքումից հետո։ Այս մասին հաղորդել է Politico-ն՝ հղում անելով անանուն եվրոպացի դիվանագետի և բանակցություններին ծանոթ անձի, փոխանցում է DW-ի ռուսական ծառայությունը։
Աղբյուրների համաձայն՝ այս պայմանը ներառված էր ԱՄՆ-ի կողմից Կիևին անցյալ շաբաթ ներկայացված առաջարկներում։
Նշվում է, որ Ուկրաինան Արևմուտքի անվտանգության երաշխիքները համարում է Ռուսաստանի հետ խաղաղության համաձայնագրի անկյունաքար։ Միևնույն ժամանակ, ԱՄՆ նախագահ Դոնալդ Թրամփը, ըստ տեղեկությունների, հայտարարել է, որ «չի հրավիրի ուկրաինացի առաջնորդներին Սպիտակ տուն»՝ մինչև համաձայնագիրը չստորագրվի։
Թրամփի վարչակազմից եկող հաղորդագրությունները «բազմակողմանի են»։ Politico-ի տվյալներով՝ նոյեմբերի 25-ին եվրոպացի ներկայացուցիչների հետ հեռախոսազրույցի ժամանակ պետքարտուղար Մարկո Ռուբիոն հայտարարել է, որ Ուկրաինայի անվտանգության երաշխիքները Թրամփի վարչակազմի համար առաջնահերթություն են, և որ դրանք քննարկվում են առանձին՝ արդեն համաձայնեցված խաղաղության համաձայնագրի այլ դրույթներից դուրս։
Ըստ Politico-ի եվրոպական դիվանագիտական աղբյուրի՝ ԱՄՆ-ը ցանկանում է արագորեն ընդունել բոլոր դրույթները մեկ միասնական փաթեթով։ Բացի այդ, ԱՄՆ պետքարտուղարը եվրոպացիների հետ զրույցում համառոտ անդրադարձել է խաղաղության համաձայնագրին վերաբերող այլ հարցերի։ Աղբյուրի խոսքով՝ դրանք վերաբերել են Ուկրաինայի տարածքային ամբողջականությանը և սառեցված ռուսական ակտիվներին։
«Որոշ եվրոպական երկրներ վախենում են, որ Թրամփի վարչակազմը կշեռքի նժարը կթեքի Ռուսաստանի կողմը»,- նշվում է հրապարակման մեջ։
Ըստ աղբյուրի՝ եվրոպացի դիվանագետներից մեկն ասել է․ «Մարդու իրավունքների, մարդասիրական իրավունքի, միջազգային իրավունքի կամ սկզբունքների մասին ոչ մի խոսք։ Սա ստեղծում է եվրոպական անվտանգության նոր ճարտարապետություն՝ լի անցքերով»։
Թարգմանությունը՝ Էմմա Չոբանյանի
