ՌԴ-ին ներկայացված Թրամփի ծրագրի տեքստը փոփոխվել է․ Պեսկովը՝ Ուկրաինայում խաղաղության պլանի մասին

Կրեմլում հայտարարել են, որ Ուկրաինայում կարգավորման վերաբերյալ ամերիկյան նոր ծրագիրը մեծ մասամբ համապատասխանում է «Անքորիջի ոգուն», բայց այն էականորեն չի քննարկվել ռուսական կողմի հետ, փոխանցում է Ինտերֆաքսը։

«Այդ ծրագիրը չի քննարկվել։ Այն իսկապես ամերիկյան կողմից ներկայացված նախագիծ է, որը մեզ է փոխանցվել։ Այս ծրագիրը մշակվել է, մասամբ, Անքորիջում ձեռք բերված համաձայնությունների հիման վրա, և այն մեծ մասամբ համապատասխանում է Անքորիջի ոգուն»,- լրագրողներին ասել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով տեղեկությունները, որ ՌԴ նախագահի ներկայացուցիչ Կիրիլ Դմիտրիևը մասնակցել է Թրամփի Ուկրաինայի ծրագրի մշակմանը։

Նա նաև նշել է, որ «իրենց ավելի վաղ ստացված տեքստն արդեն փոփոխությունների է ենթարկվել»։

Ըստ Պեսկովի՝ Կրեմլը կարծում է, որ «Թրամփի նախագիծը» կարող է լավ հիմք դառնալ կարգավորման բանակցությունների համար։

«Այս պահին միակ առարկայական բանն ամերիկյան նախագիծն է, Թրամփի նախագիծը։ Մենք կարծում ենք, որ սա կարող է շատ լավ հիմք դառնալ բանակցությունների համար։ Մենք դեռևս հավատարիմ ենք այս տեսակետին»,- նշել է նա։

Արևմտյան լրատվամիջոցներն ավելի վաղ հաղորդել էին, որ Ժնևի բանակցություններից հետո Ուկրաինայում խաղաղության պլանի կետերի թիվը 28-ից կրճատվել է մինչև 19-ի: Պեսկովը պարզաբանել է, որ թարմացված պլանը չի ներկայացվել Մոսկվային։

CBS News-ի և Financial Times-ի տվյալներով՝ ԱՄՆ բանակի նախարար Դեն Դրիսկոլը ներկայում Աբու Դաբիում է, որտեղ հանդիպումներ է անցկացնում Ռուսաստանի ներկայացուցիչների հետ:

Քննարկումների վերաբերյալ հարցին Պեսկովը պատասխանել է. «Մենք դեռ ասելիք չունենք: Հետևում ենք լրատվամիջոցների հաղորդագրություններին, վերլուծում ենք դրանք»:

Թարգմանությունը՝ Էմմա Չոբանյանի