Ռուսական զորքերը զանգվածային հարված են հասցրել Կիևին․ զոհեր և վիրավորներ կան

Ռուսական զորքերը նոյեմբերի լույս 25-ի գիշերը հարված են հասցրել Կիևին, որի հետևանքով զոհվել է երկու մարդ։ Այս մասին հայտնել է Ուկրաինայի պետական ​​արտակարգ իրավիճակների ծառայությունը։ Գերատեսչության տվյալներով՝ վիրավորվել է վեց մարդ, փոխանցում է Current time-ը։

Կիևի քաղաքապետ Վիտալի Կլիչկոն, իր հերթին, հայտնել է, որ վիրավորվել է ինը մարդ, այդ թվում՝ մեկ երեխա։

Քաղաքի Պեչերսկի շրջանում 22 հարկանի բնակելի շենքին հարվածի հետևանքով վնասվել են 4-8-րդ հարկերը։ Բռնկված հրդեհը մարվել է։

Դնեպրովսկի շրջանում ռուսական ուժերը հարվածել են  ինը հարկանի շենքի, այրվել են 5-8-րդ հարկերի բնակարանները։ Ապամոնտաժման և հնարավոր տուժածների որոնման աշխատանքները շարունակվում են։ Դարնիցկիի և Սվյատոշինսկի շրջաններում էլ հարված է հասցվել ոչ բնակելի շենքերի։

Բացի այդ, հաղորդվում է, որ Սվյատոշինսկի շրջանում, նախնական տվյալներով, զոհվել է չորս մարդ, վիրավորվել՝ առնվազն երեքը, հայտնել է քաղաքի ռազմական վարչակազմի ղեկավար Թիմուր Տկաչենկոն։

Ավելի վաղ իշխանությունները և փրկարարները հայտնել էին Կիևի Դնեպրովսկի շրջանում երկու մահվան դեպքի մասին։ Իշխանությունների հայտարարությունից հետևում է, որ Կիևում տեղի ունեցած հարձակումը, ընդհանուր առմամբ, վեց մարդու կյանք է խլել։

Օդեսայի մարզում անօդաչու թռչող սարքերը հարվածել են էներգետիկ օբյեկտներին։ Ռուսական ԱԹՍ-ների  հարձակման հետևանքով վնասվել են էներգետիկ և նավահանգստային ենթակառուցվածքները, հայտնում է Ուկրաինայի պետական ​​արտակարգ իրավիճակների ծառայությունը։ Բռնկվել են մի քանի հրդեհներ, ներկայում աշխատանքներ են տարվում դրանք մարելու ուղղությամբ։

Օդեսայի մարզային վարչակազմի ղեկավար Օլեգ Կիպերի խոսքով՝ վիրավորվել է վեց մարդ, այդ թվում՝ երկու երեխա։