Սիրիայում բախումներ են տեղի ունեցել․ իշխանությունները երկարաձգել են Հոմսում պարետային ժամը

Սիրիայի իշխանությունները երկարաձգել են Հոմսում պարետային ժամը՝ կանխելու համար երկու մարդու սպանությունից զայրացած բեդվին ցեղախմբերի կողմից ալավիական թաղամասերի վրա հարձակումն ու հրկիզումները, գրում է The National-ը։

Երկրի առողջապահության պաշտոնյան ասել է, որ «անկանոն կրակոցների» հետևանքով վիրավորվել է 18 մարդ։ Պաշտոնյան կոչ է արել «բոլոր քաղաքացիներին հետևել պարետային ժամը երկարաձգելու որոշմանը՝ իրենց անվտանգության համար», իսկ անվտանգության ուժերին՝ «ավարտել դաշտային գործողությունները»՝ Հոմսում կարգուկանոն վերականգնելու համար։

Պետական ​​լրատվամիջոցները հայտնում են, որ պարետային ժամը, որը պետք է վերացվեր ժամը 5-ին, երկարաձգվել է ևս 12 ժամով։ Այն տարածվում է մեկ միլիոն բնակչություն ունեցող քաղաքի ալավիական և խառը թաղամասերի վրա։

Հոմսը վրեժխնդրության հարձակումների և պատահական սպանությունների վայր է դարձել այն բանից հետո, երբ դեկտեմբերին «Ալ-Քաիդայի» հետ կապված «Հայաթ Թահրիր Ալ Շամ» (HTS) խմբավորումը տապալել էր նախկին նախագահ Բաշար ալ-Ասադի ռեժիմը։ Այնուամենայնիվ, վերջին 48 ժամվա ընթացքում բեդվին ցեղախմբերը գրավել են ալավիական թաղամասերը՝ հրկիզելով բնակիչների գույքը և կրակ բացելով շենքերի վրա՝ հայտնի ցեղից զույգի սպանությունից հետո։

Կիրակի կառավարությանը մոտ կանգնած սոցիալական ցանցերում տեղադրված տեսանյութերում, ենթադրաբար, երևում էր, թե ինչպես են քաղաքացիական հագուստով անվտանգության աշխատակիցներն օգնում տարհանել ալավի բնակիչներին հրդեհվող շենքից։ Հոմսի երկու բնակիչներ, որոնք չեն ցանկացել անունները հրապարակել, ասել են, որ գիշերը և վաղ առավոտյան մի քանի շրջաններից լսվել են կրակոցների և պայթյունների ձայներ: Նրանք առանձնացրել են Մուհաջիրին շրջանը, որտեղ շաբաթ սպանվել են Բանի Խալեդ ցեղի ամուսինները:

«Բոլորը սպասում են՝ արդյո՞ք այսօր իրավիճակը կհանդարտվի»,- ասել է բնակիչներից մեկը։

Իրավիճակը լիցքաթափելու նպատակով Ներքին գործերի նախարարության խոսնակ Նորեդդին Ալ Բաբան կիրակի երեկոյան հայտարարել է՝ «ոչ մի նյութական ապացույց» չկա, որը կհաստատի, որ սպանությունը կրոնական հողի վրա է կատարվել, մինչդեռ սիրիական լրատվամիջոցները հայտարարել էին, որ հանցագործության վայրում հայտնաբերվել է կրոնական կարգախոս։ Ալ Բաբան նշել է, որ կարգախոսը նպատակ է  ունեցել մոլորեցնել իշխանություններին, բորբոքել միջհամայնքային լարվածությունը և «շեղել ուշադրությունը իրական հանցագործից»։

Թարգմանությունը՝ Էմմա Չոբանյանի