29.06.2026 | 18:10
ՔՊ-ն ԱԺ փոխնախագահի թեկնածուների կընտրի // Մոսկվան կրկին ՀՀ-ի եվրաինտեգրումից է խոսել․ ԼՈՒՐԵՐ
Հայաստան-Ադրբեջան խաղաղությունը վերափոխում է Հարավային Կովկասի անվտանգության լանդշաֆտը․ Վրաստանի խորհրդարանի նախագահ
Քաղաքականություն
24.11.2025 | 17:48
Ադրբեջանի և Հայաստանի միջև կայուն խաղաղության համաձայնագրի հասնելուն ուղղված ջանքերը պատմական հնարավորություն են։ Սևծովյան տնտեսական համագործակցության կազմակերպության խորհրդարանական վեհաժողովի 66-րդ գլխավոր վեհաժողովում ունեցած ելույթում այս մասին հայտարարել է Վրաստանի խորհրդարանի խոսնակ Շալվա Պապուաշվիլին, փոխանցում է վրացական Առաջին ալիքը։
«Խաղաղությունն արդեն իսկ ձեռք է բերվել տեղում, որը վերափոխում է Հարավային Կովկասի անվտանգության լանդշաֆտը և բացում է հսկայական ներուժ ամբողջ Սևծովյան տարածաշրջանի համար՝ տնտեսական և կապակցվածության առումով։ Մենք նաև ողջունում ենք Հայաստանի և Թուրքիայի միջև հարաբերությունների կարգավորմանն ուղղված քայլերը»,- հավելել է Պապուաշվիլին։
Վրաց պաշտոնյայի խոսքով՝ վերջին տարիները ՍԾՏՀԿ-ի համար ամենադժվարիններից են եղել. Ռուսաստանի պատերազմը Ուկրաինայի դեմ և, որպես արդյունք, Սևծովյան տարածաշրջանում տեղի ունեցող իրադարձությունները զգալի ազդեցություն են ունեցել կազմակերպության գործունեության վրա։ Նա հայտարարել է, որ երկարաժամկետ խաղաղությունը ոչ միայն ցանկալի պայման է, այլև հիմք, որի վրա պետք է կառուցվեն բարգավաճումը, դիմադրողականությունը և համատեղ աճը:
«Ուկրաինայում արդար և կայուն խաղաղությունը կարևոր է ոչ միայն ուկրաինացի ժողովրդի, այլև Եվրոպայի և Սևծովյան տարածաշրջանի կայունության համար: Հետևաբար, Թբիլիսին վերահաստատում է աջակցությունը միջազգային իրավունքի և պետությունների ինքնիշխանության ու տարածքային ամբողջականության նկատմամբ հարգանքի վրա հիմնված համապարփակ խաղաղության հասնելու ջանքերին»,- ասել է Վրաստանի խորհրդարանի խոսնակը։
Թարգմանությունը՝ Էմմա Չոբանյանի
