Ուկրաինան ՌԴ-ի հետ խաղաղության համար «կարմիր գծերն» է ուրվագծել

Ուկրաինայի Գերագույն ռադայի խոսնակ Ռուսլան Ստեֆանչուկն ուրվագծել է Ռուսաստանի հետ խաղաղ կարգավորման քննարկման հիմնական կետերը: Շվեդիայի մայրաքաղաք Ստոկհոլմում «Ղրիմի պլատֆորմի» չորրորդ խորհրդարանական գագաթնաժողովում ունեցած ելույթում նա նշել է ԱՄՆ-ի կողմից առաջարկվող խաղաղության ծրագրի երեք «կարմիր գիծ», «որոնցից այն կողմ ոչ ոք իրավունք չունի անցնել՝ ո՛չ ֆիզիկապես, ո՛չ իրավականորեն, ո՛չ էլ բարոյական առումով», փոխանցում է DW-ի ռուսական ծառայությունը։

«Ռուսաստանի կողմից ուկրաինական տարածքների օկուպացիայի ոչ մի իրավական ճանաչում։ Ուկրաինայի պաշտպանական ուժերի թվաքանակի որևէ սահմանափակում։ Ուկրաինայի՝ ապագա դաշինքներ ընտրելու իրավունքի վրա ոչ մի վետո»,- ասել է Ստեֆանչուկը։

Նա հավելել է, որ Ուկրաինայի անդամակցությունը ԵՄ-ին և ՆԱՏՕ-ին պետք է լինի անվտանգության երաշխիքների և ցանկացած խաղաղության ծրագրի տարր։ Ըստ Ռադայի խոսնակի՝ արդարացի կլինի նաև Ռուսաստանի սառեցված ակտիվները որպես «ագրեսիայի համար գին» օգտագործելը։

«Մենք անկեղծորեն հավատում ենք, որ ԵՄ Խորհուրդը դեկտեմբերի 18-19-ին այս հարցի վերաբերյալ արդար որոշում կկայացնի»,- ասել է նա։

Ուկրաինայի նախագահ Վլադիմիր Զելենսկին էլ տեսակապով ոյնեցած ելույթում ասել է, որ Ուկրաինան շարունակում է համագործակցել իր գործընկերների, մասնավորապես, Միացյալ Նահանգների հետ՝ փնտրելով փոխզիջում, որը «կամրապնդի, այլ ոչ թե կթուլացնի Ուկրաինան»։

«Միացյալ Նահանգների հետ մեր համակարգված քայլերում փորձում ենք ապահովել, որ այդ փաստաթղթերը ներառեն չափազանց զգայուն կետեր, այդ թվում՝ Ռուսաստանից բոլոր ուկրաինացի բանտարկյալների ազատ արձակումը՝ «բոլորը բոլորի դիմաց» բանաձևով և Ռուսաստանի կողմից առևանգված բոլոր ուկրաինացի երեխաների վերադարձը»,- հայտարարել է Ուկրաինայի նախագահը։

Թարգմանությունը՝ Էմմա Չոբանյանի