Պուտինն ու Էրդողանը ուկրաինական կարգավորման ԱՄՆ առաջարկներն են քննարկել

Ռուսաստանի նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանի հետ հեռախոսազրույցում Ուկրաինայի շուրջ ստեղծված իրավիճակն է քննարկել։ Այս մասին հայտնում է Կրեմլի մամուլի ծառայությունը, գրում է ՏԱՍՍ-ը։

«Անցկացվել է մտքերի փոխանակում Ուկրաինայի շուրջ ստեղծված իրավիճակի վերաբերյալ, այդ թվում՝ խաղաղ կարգավորման ամերիկյան առաջարկների համատեքստում։ Վլադիմիր Պուտինը նշել է, որ այդ առաջարկները, ռուսական կողմից վերանայված տարբերակով, համապատասխանում են Ալյասկայում ռուս-ամերիկյան գագաթնաժողովի քննարկումներին և, սկզբունքորեն, կարող են հիմք հանդիսանալ վերջնական խաղաղ կարգավորման համար»,- ասվում է հայտարարության մեջ։

Նշվում է, որ Պուտինը վերահաստատել է Ռուսաստանի շահագրգռվածությունը ուկրաինական ճգնաժամի քաղաքական և դիվանագիտական ​​կարգավորման հարցում։ Նա նաև ընդգծել է, որ Ուկրաինայի վերաբերյալ ԱՄՆ առաջարկները, իրենց ներկայիս տեսքով, կարող են հիմք հանդիսանալ կարգավորման համար։

Թուրքիայի նախագահն իր հերթին պատրաստակամություն է հայտնել օգնություն ցուցաբերել Ուկրաինայի հարցում և Ստամբուլի հարթակը տրամադրել բանակցությունների համար։ Պուտինը և Էրդողանը նաև համաձայնության են եկել ակտիվացնել ռուս-թուրքական շփումներն ուկրաինական հարցի շուրջ տարբեր մակարդակներում։

Թուրքական կողմի հաղորդմամբ էլ՝ զրույցի ընթացքում քննարկվել են Թուրքիայի և Ռուսաստանի միջև երկկողմ հարաբերությունները, Ռուսաստանի և Ուկրաինայի միջև պատերազմը, ինչպես նաև տարածաշրջանային և համաշխարհային հարցեր։

Նոյեմբերի 23-ին տեղի ունեցած մամուլի ասուլիսում Էրդողանը հայտնել էր, որ նախատեսում է երկուշաբթի Պուտինի հետ հեռախոսով քննարկել ուկրաինական հակամարտությունը։

«Կտեսնենք, թե ինչ կարող ենք միասին անել, ինչպիսի խաղաղություն կարող ենք հաստատել»,- ասել էր նա։

Էրդողանը նաև հայտարարել էր Պուտինի հետ Սև ծովի հացահատիկային միջանցքի վերականգնման հարցը քննարկելու մտադրության մասին։

«Ես կխնդրեմ նրան թույլ տալ ինձ սկսել այս գործընթացը, քանի որ կարծում եմ, որ դա բոլորին օգուտ կբերի»,- ասել էր Թուրքիայի նախագահը։

Թարգմանությունը՝ Էմմա Չոբանյանի