ԱՄՆ-ՌԴ հանդիպում Ուկրաինայի հարցով դեռևս չի նախատեսվում․ Պեսկով

Ռուսական կողմը դեռևս որևէ պաշտոնական տեղեկատվություն չի ստացել Միացյալ Նահանգներից Ժնևում Ուկրաինայի շուրջ բանակցությունների արդյունքների վերաբերյալ, սակայն ուշադիր հետևում է այս թեմայի վերաբերյալ լրատվամիջոցների հրապարակումներին։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Մենք, իհարկե, շատ ուշադիր հետևում ենք վերջին մի քանի օրերի ընթացքում Ժնևից եկող լրատվամիջոցների հաղորդագրություններին։ Բայց մենք դեռևս որևէ պաշտոնական տեղեկություն չենք ստացել»,- լագրողներին ասել է Կրեմլի խոսնակը։

Հարցին՝ Մոսկվայի կարծիքով՝ ո՞վ պետք է ստորագրի կարգավորման ծրագիրն ուկրաինական կողմից, հաշվի առնելով, որ Կիևի իշխանություններին ռուսական կողմը ոչ լեգիտիմ է համարում, Պեսկովը պատասխանել է․ «Մենք դեռևս որևէ ծրագիր չենք տեսել։ Մենք կարդացել ենք հայտարարությունը Ժնևում տեղի ունեցած քննարկումների արդյունքներով։ Որոշակի ճշգրտումներ են կատարվել ավելի վաղ մեր տեսած տեքստում։ Կսպասենք։ Ըստ երևույթին՝ երկխոսությունը շարունակվում է, և որոշ շփումներ կշարունակվեն։ Մինչ այժմ, կրկնում եմ, մենք որևէ պաշտոնական բան չենք ստացել»։

Կրեմլի խոսնակը ճեպազրույցի ժամանակ նաև հայտարարել է, որ դեռևս կոնկրետ մանրամասներ չկան ուկրաինական կարգավորման շուրջ ռուս-ամերիկյան հանդիպման հնարավորության վերաբերյալ։

«Դեռ ոչ»,- այս շաբաթ նման հանդիպման մասին հարցին պատասխանել է Պեսկովը։

Հիշեցնենք՝ Ուկրաինայի և ԱՄՆ-ի պաշտոնյաները հայտարարել էին, որ երկու երկրների պատվիրակությունների համատեղ ջանքերով պատրաստվել է թարմացված «շրջանակային փաստաթուղթ»՝ Ուկրաինայում խաղաղության հասնելու համար Ժնևում կայացած «արդյունավետ բանակցությունների» ընթացքում։

Թարգմանությունը՝ Էմմա Չոբանյանի