06.12.2025 | 13:22
Գուգարաց թեմի քահանաները հանդես են եկել հայտարարությամբ՝ ի պաշտպանություն Գարեգին Բ կաթողիկոսի
Մերցը ներկայացրել է իր առաջարկը Ուկրաինայի խաղաղության ճանապարհի վերաբերյալ
Քաղաքականություն
23.11.2025 | 20:02
Գերմանիայի կանցլեր Ֆրիդրիխ Մերցը ներկայացրել է սեփական առաջարկը՝ Ռուսաստանի ագրեսիվ պատերազմի դադարեցման շուրջ բանակցությունների ընթացքում։ Խոսքը վերաբերում է ԱՄՆ 28 կետանոց «խաղաղության պլանի» կրճատված տարբերակին, ասել է նա Յոհանեսբուրգում ընթացող G20-ի գագաթնաժողովում, փոխանցում է DW-ն։
Քաղաքական գործիչը նշել է, որ կասկածամիտ է, թե հնարավոր կլինի համաձայնեցնել ԱՄՆ խաղաղության առաջարկը մինչև նոյեմբերի 27-ը՝ հինգշաբթի, որը սահմանել է Դոնալդ Թրամփը Ուկրաինայի համար։
«Եթե 28 կետերը շատ են հինգ օրվա համար, ապա ես, առնվազն, կցանկանայի փորձել գտնել մեկ կետ, որի շուրջ ուկրաինական կողմը կարողանա պայմանավորվել Ռուսաստանի հետ՝ ԱՄՆ-ի և եվրոպացիների համաձայնությամբ»,-ասել է Մերցը։
Նա չի բացահայտել իր ներկայացրած առաջարկի մանրամասները։
Մերցի խոսքով՝ այս առաջարկը հիմա քննարկվում է նաև Ժնևում ԵՄ, ԱՄՆ և Ուկրաինայի ներկայացուցիչների միջև ընթացող բանակցություններում։
«Հնարավոր է, որ կարողանանք առաջ շարժվել, բայց ես շարունակում եմ կասկածել, որ դա հնարավոր կլինի անել կարճ ժամկետում», -ընդգծել է Գերմանիայի կառավարության ղեկավարը։
Գերմանիայի կանցլերի կարծիքով՝ հատկապես կարևոր է հարցը, թե ինչ անվտանգության ապագա երաշխիքներ պետք է ունենա Ուկրաինան, երբ ավարտվի նրա դեմ սկսված պատերազմը․ «2025 թվականին Ռուսաստանին չի կարելի վստահել այնպես, ինչպես 1995-ին»,-հայտարարել է նա՝ նկատի ունենալով Բուդապեշտյան հուշագիրը։
Այդ փաստաթուղթը ենթադրում էր, որ Ռուսաստանը չի խախտի Ուկրաինայի տարածքային ամբողջականությունն ու ինքնավարությունը։ Սակայն Կիևի համար նախատեսված երաշխիքները փաստաթղթում ձևակերպված էին առանց կոնկրետ մանրամասների և պարտավորությունների այն երկրների համար, որոնք հանդես էին գալիս որպես երաշխավորներ, այդ թվում՝ Մեծ Բրիտանիան և ԱՄՆ-ը։ Փաստաթղթի տեքստը չէր նախատեսում Ուկրաինայի անմիջական ռազմական պաշտպանություն ՌԴ հարձակման դեպքում։
