Ժնևում մեկնարկել են ԱՄՆ-ի, Ուկրաինայի և Եվրոպայի բանակցությունները

Ժնևում մեկնարկել են ԱՄՆ-ի, Ուկրաինայի և Եվրոպայի բանակցությունները Դոնալդ Թրամփի խաղաղության պլանի շուրջ։

Այս մասին հայտնել է Ուկրաինայի նախագահի գրասենյակի ղեկավար Անդրեյ Երմակը։ Ուկրաինայի պատվիրակությունը մի շարք հանդիպումներ է անցկացրել Գերմանիայի, Ֆրանսիայի և Մեծ Բրիտանիայի ներկայացուցիչների հետ։

«Հաջորդ հանդիպումը՝ ԱՄՆ պատվիրակության հետ է։ Նրանց դիրքորոշումը շատ կառուցողական է։ Ընդհանուր առմամբ այսօր նախատեսված է մի շարք հանդիպումներ տարբեր ձևաչափերով։ Մենք շարունակում ենք համատեղ աշխատել՝ Ուկրաինայի համար կայուն և արդար խաղաղության հասնելու նպատակով»,- նշել է նա։

Reuters-ի տվյալներով՝ ԱՄՆ պատվիրակության կազմում են Թրամփի հատուկ բանագնաց Սթիվ Ուիթքոֆը և պետքարտուղար Մարկո Ռուբիոն, նրանք արդեն ժամանել են Ժնև։

Հիշեցնենք՝ նոյեմբերի 22-ին Դոնալդ Թրամփը բացասական է պատասխանել այն հարցին, թե արդյոք Ուկրաինային ներկայացված պատերազմը խաղաղ կարգավորելու պլանը վերջնական տարբերակն է։ Միևնույն ժամանակ, նախօրեին ԱՄՆ առաջնորդը նոյեմբերի 27-ը անվանել էր «արդյունավետ ժամկետ», որպեսզի Ուկրաինան համաձայնվի առաջարկին։ Քաղաքական գործիչը նաև պահանջել էր, որ Ուկրաինայի նախագահ Վլադիմիր Զելենսկին հաստատի «խաղաղության պլանը»։

Փաստաթուղթը մինչ այժմ պաշտոնապես չի հրապարակվել։ Մեդիայում հրապարակված հատվածներից պարզ է դառնում, որ Ուկրաինան, մասնավորապես, պետք է համաձայնի զինված ուժերի կրճատմանն ու տարածքային զիջումների Ռուսաստանի օգտին, իսկ ԱՄՆ-ը և Եվրոպան պարտավորվում են ֆինանսավորել երկրի վերականգնումը։ Բացի այդ՝ ակնկալվում է, որ Ռուսաստանի նկատմամբ սահմանված պատժամիջոցները աստիճանաբար կհանվեն, իսկ Մոսկվան և Վաշինգտոնը կնքելու են երկարաժամկետ տնտեսական համագործակցության մասին համաձայնագիր։