04.08.2026 | 10:31
Ավարտվել է քրեական հեղինակության և ենթամշակույթ կրող խմբավորմանը մասնակցելու գործի նախաքննությունը․ ՔԿ
Ռուսաստանը ոչ միայն կազատվի Ուկրաինային փոխհատուցում վճարելու պարտավորությունից, այլև առևտրային օգուտներ կստանա․ ԵՄ-ն՝ արտահոսած փաստաթղթերի մասին
Քաղաքականություն
22.11.2025 | 13:56
Միացյալ Նահանգների կողմից առաջ քաշված խաղաղության ծրագիրը նոր բարդություններ է առաջացրել Եվրամիության առաջարկի իրականացման գործում, այն է՝ սառեցված ռուսական ակտիվները որպես փոխհատուցման վարկ տրամադրել Ուկրաինային․ գրում է euronews.com-ը։
Նշվում է, որ արտահոսած փաստաթղթերը ցույց են տալիս, որ սառեցված ակտիվները կազատվեն և որպես ներդրում կօգտագործվեն։
Միացյալ Նահանգների կողմից առաջ քաշված նոր խաղաղության ծրագիրը կասկածի տակ է դրել Եվրամիության առաջարկը՝ օգտագործել սառեցված ռուսական ակտիվները Ուկրաինային օգնելու համար։
ԵՄ-ի դիրքորոշումը կտրուկ փոփոխած ԱՄՆ-ի ծրագիրն առաջարկում է սառեցված ակտիվները բացել, ազատել և վերածել Վաշինգտոնի կողմից կառավարվող ներդրումային հարթակի։ Ձևակերպումը ենթադրում է, որ Ռուսաստանը ոչ միայն կազատվի ապագա կարգավորման ժամանակ փոխհատուցում վճարելու պարտավորությունից, այլև կստանա առևտրային օգուտներ։
«Կիևին բանակցությունների համար ներկայացված ծրագիրը հակասում է ԵՄ-ի նպատակին՝ ստիպել Ռուսաստանին վճարել պատերազմի պատճառած վնասների համար և փոխհատուցման վարկ տրամադրել Ուկրաինայի ֆինանսական և ռազմական կարիքները հոգալու համար»,- ասված է ԵՄ-ի տարածած հաղորդագրությունում։
Հիշեցնենք, որ ԱՄՆ-ը 28 կետից բաղկացած խաղաղության ծրագիր էր առաջարկել։
Որին ՌԴ նախագահ Վլադիմիր Պուտինը պատասխանել էր՝ ասելով, որ այն կարող է Ուկրաինայի հարցով կարգավորման հիմք դառնալ։
Իսկ Ուկրաինայի նախագահ Վլադիմիր Զելենսկին հայտարարել էր, որ իր երկիրը կանգնած է «շատ դժվար ընտրության առաջ՝ կամ կորցնել արժանապատվությունը, կամ ռիսկի դիմել կորցնելու կարևոր գործընկերոջը», նկատի ունենալով Միացյալ Նահանգները:
Ավելի ուշ Միացյալ Նահանգները Ուկրաինային սպառնացել էր դադարեցնել հետախուզական տվյալների և զենքի տրամադրումը, եթե Ուկրաինան մինչև նոյեմբերի 27-ը չստորագրի խաղաղության ծրագիրը։
Թարգմանությունը՝ Անահիտ Խաչատրյանի
