31.10.2026 | 10:07
ՀՀ տարածքում ավտոճանապարհներն անցանելի են
Մեր «կարմիր գծերը» հստակ են և անփոփոխ․ Ուկրաինան ՄԱԿ-ի ԱԽ նիստում մեկնաբանել է Թրամփի խաղաղության ծրագիրը
Քաղաքականություն
21.11.2025 | 15:51
ՄԱԿ-ի Անվտանգության խորհրդի նիստում կառույցում Ուկրաինայի մշտական ներկայացուցչի տեղակալ Քրիստինա Գայովիշինը, խոսելով ԱՄՆ-ի կողմից առաջարկված խաղաղության ծրագրի մասին, հիշեցրել է, որ իր երկիրն ունի «կարմիր գծեր», որոնք «հստակ և անփոփոխ» են, գրում է Meduza-ն։
«Մենք երբեք՝ ո՛չ պաշտոնապես, ո՛չ էլ որևէ այլ կերպ, չենք ճանաչի որպես ռուսական Ուկրաինայի տարածքը, որը ժամանակավորապես օկուպացված է Ռուսաստանի Դաշնության կողմից։ Մեր հողը վաճառքի ենթակա չէ։ Ուկրաինան չի համաձայնի որևէ սահմանափակման իր ինքնապաշտպանության իրավունքի կամ մեր զինված ուժերի չափերի և կարողությունների վերաբերյալ։ Մենք նաև չենք հանդուրժի մեր ինքնիշխանության որևէ խախտում, այդ թվում՝ մեր ինքնիշխան իրավունքը՝ ընտրելու այն դաշինքները, որոնց ցանկանում ենք միանալ։ Մենք չենք պարգևատրի ռուսական ագրեսիայի հիմքում ընկած ցեղասպանական ձգտումները՝ խաթարելով մեր ինքնությունը, մասնավորապես, մեր լեզուն»,- հայտարարել է նա։
Միաժամանակ, ուկրաինացի դիվանագետն ընդգծել է, որ իր երկիրը պատրաստ է կառուցողական աշխատել խաղաղության պլանի վրա, որի նախագիծը ստացել է Միացյալ Նահանգներից։
Հիշեցնենք, որ ավելի վաղ Ուկրաինայի Գերագույն ռադայի պատգամավոր Ալեքսեյ Գոնչարենկոն իր տելեգրամ ալիքում հրապարակել էր 28 կետից բաղկացած ԱՄՆ-ի խաղաղության ծրագիրը։
Թարգմանությունը՝ Էմմա Չոբանյանի
