Քաղաքականություն
21.11.2025 | 15:25
Բրազիլիայի Բելեմ քաղաքում ընթացող COP30 կլիմայական համաժողովի հազարավոր մասնակիցներ ստիպված են եղել տարհանվել տաղավարներից մեկում բռնկված խոշոր հրդեհի պատճառով։ Գագաթնաժողովը լուսաբանող BBC-ի լրագրողներն արձանագրել են բոցեր, ծխի ամպեր և հրշեջ մեքենաներ, որոնք ժամանել են գագաթնաժողովի վայր՝ նախկին օդանավակայանի տարածք։
Որոշ մասնակիցներ լքել են գագաթնաժողովը և վերադարձել իրենց հյուրանոցներ։
Հրդեհի մասին հաղորդագրությունների տարածումից կարճ ժամանակ անց ՄԱԿ-ի գագաթնաժողովի կազմակերպիչը հայտարարել է, որ հրդեհը վերահսկողության տակ է և պատճառել է «սահմանափակ վնաս»։
Պատահարի պատճառն անհայտ է։ Այնուամենայնիվ, ականատեսներից մեկը BBC-ին ասել է, որ կարծում է՝ հրդեհը սկսվել է էլեկտրական խափանման պատճառով։ Երբ հրդեհը բռնկվել է, գագաթնաժողովի մասնակիցներն արդեն ավարտում էին բանակցությունները և փորձում էին համաձայնության գալ այն քայլերի շուրջ, որոնք երկրները պետք է ձեռնարկեն գլոբալ կլիմայի փոփոխության դեմ պայքարի համար։
«Մեծ խուճապ է, բոլորը փախչում են, իրավիճակը շատ դրամատիկ է։ ՄԱԿ-ի անվտանգության աշխատակիցները մեզ հրամայում են հեռանալ»,- պատմել է BBC-ի կլիմայի փոփոխության հարցերով խմբագիր Ջասթին Ռոուլաթը։
ՄԱԿ-ը հայտնել է, որ հրշեջ ծառայության աշխատակիցները ստուգում են տարածքը՝ դրա անվտանգությունը գնահատելու համար։ Հազարավոր մարդիկ, այդ թվում՝ մոտ 200 երկրներից պատվիրակություններ են մասնակցում ՄԱԿ-ի կողմից հյուրընկալվող կլիմայական բանակցություններին։
