Քաղաքականություն
21.11.2025 | 10:59
Ուկրաինայի զինված ուժերի գլխավոր շտաբը հերքել է Ռուսաստանի ԶՈՒ Գլխավոր շտաբի պետ Վալերի Գերասիմովի պնդումները, որ ռուսական զորքերը վերահսկողություն են հաստատել Ուկրաինայի Խարկովի մարզի Կուպյանսկ քաղաքի նկատմամբ, փոխանցում է DW-ի ռուսական ծառայությունը։
«Կուպյանսկը գտնվում է Ուկրաինայի պաշտպանության ուժերի վերահսկողության տակ։ Քաղաքում և դրա շրջակայքում շարունակվում են հակադիվերսիոն և հատուկ գործողությունները՝ քաղաք ներթափանցած թշնամու դիվերսիոն և հետախուզական խմբերի որոնման ու ոչնչացման համար։ Նմանատիպ իրավիճակ է նաև Յամպոլի հետ կապված։ Մեր զորքերը շարունակում են որոնողական և հարվածային գործողությունները բնակավայրի մոտ։ Այն պնդումը, որ Խարկովի մարզի Վովչանսկ քաղաքի 80%-ը և Պոկրովսկ քաղաքի 70%-ը գրավվել են, նույնպես կեղծ է»,- ասվում է Ուկրաինայի ԶՈՒ Գլխավոր շտաբի հայտարարության մեջ։
Նախօրեին Գերասիմովը ՌԴ նախագահ Վլադիմիր Պուտինի՝ «Արևմուտք» խմբավորման հրամանատարական կետ այցելության ժամանակ զեկուցել էր ռուսական ուժերի կողմից Կուպյանսկի գրավման մասին։ Նա նաև հայտնել էր, որ Խարկովի մարզի Վովչանսկի տարածքի ավելի քան 80%-ը և Դոնեցկի մարզի Պոկրովսկի տարածքի 70%-ը գտնվում են ռուսական բանակի վերահսկողության տակ։
Պուտինը, իր հերթին, հայտարարել էր, որ Ուկրաինայի զինված ուժերի 15 գումարտակ շրջափակված է Կուպյանսկի մարզում։ Նա նաև նշել էր, որ Դոնեցկի մարզի Կոնստանիկովկա քաղաքում մարտեր են ընթանում։
2022 թվականի փետրվարի 27-ին ռուսական բանակը գրավել էր քաղաքը, սակայն նույն թվականի սեպտեմբերին ուկրաինական կողմը վերականգնել էր վերահսկողությունը բնակավայրի նկատմամբ։
Կուպյանսկի շուրջ մարտերը վերսկսվել են 2023 թվականի ամռանը: Մի քանի բնակավայրերում քաղաքացիական բնակչության պարտադիր տարհանումներ են իրականացվել, իսկ 2025 թվականի փետրվարին Կուպյանսկի ռազմական վարչակազմի ղեկավար Անդրեյ Բեսեդինը հայտնել էր քաղաքում տիրող կրիտիկական իրավիճակի մասին:
2025 թվականի սեպտեմբերին Կուպյանսկ մուտքը փակվել է քաղաքացիական բնակչության համար, իսկ հոկտեմբերին Ուկրաինայի իշխանությունները սկսել էին տարհանել բնակիչներին քաղաքի մոտակայքում գտնվող տասնյակ գյուղերից, որտեղ ինտենսիվ մարտեր էին ընթանում ռուսական բանակի հետ։
Թարգմանությունը՝ Էմմա Չոբանյանի
