15.12.2025 | 13:49
Ուիթկոֆը հայտարարել է Բեռլինում Զելենսկիի հետ բանակցություններում «նշանակալի առաջընթացի» մասին
Մխիթար Հայրապետյանն ընդունել է Լաս Վեգասում ՀՀ պատվավոր հյուպատոս Ատրուշան Արմենյանին
31.10.2018 | 20:35
Հոկտեմբերի 31-ին սփյուռքի նախարարի պաշտոնակատար Մխիթար Հայրապետյանն ընդունեց Լաս Վեգասում ՀՀ պատվավոր հյուպատոս Ատրուշան (Էնդի) Արմենյանին:
Ողջունելով հյուրին՝ Մխիթար Հայրապետյանը բարձր գնահատեց պատվավոր հյուպատոսի՝ Նևադա նահանգում հայկական մշակույթի զարգացմանը, պատմության և ժառանգության պահպանմանը, հայ համայնքի շահերի ներկայացմանն ուղղված ջանքերը:
Արմենյանը միշտ կապված է եղել հայկական արմատներին, մեծապես նպաստել է Նևադա նահանգում Հայ Առաքելական առաջին եկեղեցու կառուցմանը:
Շնորհակալություն հայտնելով ընդունելության համար՝ Ատրուշան Արմենյանը նշեց, որ Լաս Վեգասում գործում են երկու մեկօրյա հայկական դպրոցներ, որոնցից յուրաքանչյուրում սովորում է մոտավորապես 60 աշակերտ:
Շեշտելով, որ տեղի հայ համայնքն ընդլայնվում է՝ այսօր ընդգրկելով արդեն 15-20 հազար հայ, Մխիթար Հայրապետյանն առաջարկեց լրջորեն մտածել նաև ամենօրյա դպրոցի հիմնման մասին, որը մեծապես կնպաստի համայնքում հայապահպանության աշխատանքերի արդյունավետության բարձրացմանը: Նախարարի պաշտոնակատարն ընդգծեց նաև, որ համայնքային հետաքրքրության և անհրաժեշտության դեպքում և՛ սփյուռքի, և՛ կրթության և գիտության նախարարությունները պատրաստ են հնարավորինս աջակցել: Պայմանավորվածություն ձեռք բերվեց առաջիկայում տեսակապի միջոցով առավել մանրամասն քննարկել առաջարկը:
Հանդիպման ընթացքում անդրադարձ կատարվեց նաև ամերիկահայ Դենի Թարխանյանի՝ ԱՄՆ Կոնգրեսի ընտրություններին մասնակցությանը: Թարխանյանը առաջադրվել է հարազատ Նևադա նահանգում: Այս առումով Մխիթար Հայրապետյանը կոչ արեց նևադահայությանը լինել միասնական ու համախմբվել համահայկական շահերի շուրջ:
