31.10.2026 | 14:42
COP17-ի շրջանակում ընդունվել է շուրջ 50 որոշում․ արդյունքները գերազանցել են սպասելիքները․ նախարար
ԱՄՆ-ը կարող է մինչև շաբաթվա վերջ ներկայացնել Ուկրաինայի խաղաղության ծրագիրը
Քաղաքականություն
19.11.2025 | 21:35
Վաշինգտոնը պատրաստվում է հայտարարել խաղաղության համաձայնագրի մասին, որը, ըստ ԱՄՆ պաշտոնյաների, կավարտի Ռուսաստանի պատերազմը Ուկրաինայի դեմ, հայտնել է Politico-ի Սպիտակ տան թղթակից Դաշա Բերնսը, փոխանցում է DW-ի ռուսական ծառայությունը։
ԱՄՆ նախագահ Դոնալդ Թրամփի վարչակազմի բարձրաստիճան պաշտոնյան նրան ասել է, որ բոլոր կողմերի համաձայնությունը սպասվում է մինչև ամսվա վերջ, հնարավոր է՝ «արդեն այս շաբաթ»։ Politico-ն հիշեցնում է ԱՄՆ բանակի նախարար Դեն Դրիսկոլի անսպասելի այցը Կիև, որը պետք է հանդիպի Ուկրաինայի նախագահ Վլադիմիր Զելենսկիի հետ։
Միևնույն ժամանակ, Axios-ը հայտնել էր, որ ԱՄՆ-ը և Ռուսաստանն աշխատում են Ուկրաինայի համար գաղտնի 28 կետանոց խաղաղության ծրագրի ուղղությամբ։
Թրամփի վարչակազմի պաշտոնյաները Politico-ին հասկացել են, որ «լուրջ առաջընթացի շեմին են»։ Սակայն, ըստ երևույթին, Ուկրաինան անմիջականորեն չի մասնակցել խաղաղության ծրագրի մշակմանը, ինչպես նաև ԱՄՆ-ի եվրոպացի դաշնակիցները, նշում է Politico-ն։
Դեռևս պարզ չէ նաև, թե ինչ լուծումներ է առաջարկում փաստաթուղթն ամենահրատապ հարցերի՝ Ռուսաստանի կողմից Ուկրաինայի տարածքի բռնազավթման, ուկրաինացի երեխաների առևանգման և Ուկրաինայի ապագա անվտանգության երաշխիքների վերաբերյալ։
Դաշա Բերնսը պնդում է, որ Սպիտակ տունը նախատեսում է խաղաղության համաձայնագիրը Զելենսկիին ներկայացնել որպես որոշված գործարք։
«Այն, ինչ մենք պատրաստվում ենք առաջարկել Ուկրաինային, ողջամիտ է»,- մեջբերում է նա ԱՄՆ նախագահի վարչակազմի աղբյուրին։
Ըստ Politico-ի աղբյուրների՝ առաջնագծում ստեղծված ծանր իրավիճակի և կոռուպցիոն սկանդալի ճնշման տակ Զելենսկին ստիպված կլինի ընդունել պայմանները։
Թարգմանությունը՝ Էմմա Չոբանյանի
