Քաղաքականություն
19.11.2025 | 22:52
Թուրքիան Սիրիայում 2012 թվականից ի վեր առաջին անգամ դեսպան է նշանակել։ Թուրքիայի նախագահ Ռեջեփ Թայիփ Էրդողանի հրամանագրով՝ այդ պաշտոնում նշանակվել է Նուհ Յըլմազը, գրում է Turkiye today-ը։
Այս նշանակումը տեղի է ունենում զգայուն ժամանակահատվածում, քանի որ, ըստ տեղեկությունների, Սիրիայի դեմոկրատական ուժերը (SDF) և Սիրիայի նոր վարչակազմը Միացյալ Նահանգների աջակցությամբ բանակցություններ են վարում Սիրիայի որոշ մասերի միավորմանն ուղղված հնարավոր քաղաքական պայմանավորվածությունների շուրջ։
Մինչ այս, Նուհ Յըլմազը զբաղեցնում էր Թուրքիայի փոխարտգործնախարարի պաշտոնը։ Սա, որոշ թուրք վերլուծաբանների կարծիքով, արտացոլում է Թուրքիայի կողմից Սիրիայում կայունությանը տրված կարևորությունը։
Բաշար ալ-Ասադի իշխանության անկումից հետո, 12 տարի անց, Թուրքիան վերաբացել էր իր դեսպանատունը Դամասկոսում։
Յըլմազը 2013-2023 թվականներին զբաղեցրել է տարբեր պաշտոններ Ազգային հետախուզական կազմակերպությունում (MIT): Նա ղեկավարել է նաև ԱԳՆ ռազմավարական հետազոտությունների կենտրոնը (SAM), եղել է արտաքին գործերի նախարարի գլխավոր խորհրդականը: Յըլմազը 2024 թվականի մայիսի 20-ից մինչև 2025 թվականի հոկտեմբերի 24-ը զբաղեցրել է արտաքին գործերի փոխնախարարի պաշտոնը:
Թարգմանությունը՝ Էմմա Չոբանյանի
