09.06.2026 | 14:24
Աֆրիկայի լավագույն մրցավարը չի ստացել ԱՄՆ մուտքի վիզա ու չի սպասարկի ԱԱ-2026-ի խաղերը
Բաքուն հետաքրքրված է «Թրամփի երթուղու» շուրջ աշխատանքների արագացմամբ. Բայրամովն ընդունել է ԱՄՆ պետքարտուղարի տեղակալին
Քաղաքականություն
19.11.2025 | 16:33
Ադրբեջանի արտաքին գործերի նախարար Ջեյհուն Բայրամովն ու ԱՄՆ պետքարտուղարի քաղաքական հարցերով տեղակալ Էլիսոն Հուքերը Բաքվում հանդիպմանը մտքեր են փոխանակել ադրբեջանա-ամերիկյան երկկողմ համագործակցության ներկա վիճակի և զարգացման հեռանկարների, Ադրբեջանի և Հայաստանի միջև խաղաղության գործընթացի, ինչպես նաև տարածաշրջանային և գլոբալ անվտանգության հարցերի շուրջ։
Ադրբեջանի ԱԳՆ-ի հաղորդմամբ՝ գոհունակությամբ նշվել է, որ օգոստոսի 8-ին Վաշինգտոնում տեղի ունեցած պատմական հանդիպման ժամանակ ձեռք են բերվել համաձայնություններ, ընդգծվել է երկու երկրների միջև ռազմավարական գործընկերության զարգացման համատեղ ջանքերի կարևորությունը։ Անդրադարձ է եղել տարածաշրջանային կայունության, էներգետիկ անվտանգության և տրանսպորտային միջանցքների ընդլայնման ոլորտներում համագործակցության ամրապնդման կարևորության հարցերի։
Փոխանցվել է, որ Ադրբեջանը հետաքրքրված է ԱՄՆ-ի կողմից իրականացվող «Միջազգային խաղաղության և բարգավաճման համար Թրամփի ուղու» աշխատանքների իրականացման արագացմամբ, որն ուղղված է ապահովելու Ադրբեջանի մայրցամաքային մասի և Նախիջևանի միջև անխոչընդոտ կապը։
Հանդիպմանը նաև մտքերի փոխանակում է տեղի ունեցել Մերձավոր Արևելքում ստեղծված իրավիճակի և փոխադարձ հետաքրքրություն ներկայացնող տարածաշրջանային այլ հարցերի շուրջ։
Ավելի վաղ ԱՄՆ պետքարտուղարի տեղակալն այցով Երևանում էր։ Այստեղ նա տարբեր պաշտոնյաների է հանդիպել, այդ թվում`ՀՀ վարչապետ Նիկոլ Փաշինյանին ու ԱԳ նախարար Արարատ Միրզոյանին։
Թարգմանությունը՝ Էմմա Չոբանյանի
