Բաքուն հայտարարում է, թե Ադրբեջանի պաշտպանունակության ամրապնդումը 2026թ․ բյուջեի հիմնական առաջնահերթություններից է

Ադրբեջանի պաշտպանունակության և ազգային անվտանգության ամրապնդման ֆինանսական աջակցությունը նշվել է որպես 2026 թվականի պետական ​​բյուջեի հիմնական առաջնահերթություններից մեկը։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի ֆինանսների նախարար Սահիլ Բաբաևը Միլլի Մեջլիսի լիագումար նիստում «2026 թվականի պետական ​​բյուջեի մասին» օրենքի նախագծի քննարկման ժամանակ։

Ադրբեջանցի պաշտոնյայի խոսքով՝ 2026 թվականի բյուջեի ծախսերի 21%-ը, որը կազմում է 8,7 միլիարդ մանաթ, հատկացվում է պաշտպանությանը և ազգային անվտանգությանը։ Այս գումարը 319 միլիոն մանաթով ավելի է այս տարվա համեմատ։

«2026 թվականի պետ​​բյուջեի եկամուտները կանխատեսվում են 38,6 միլիարդ մանաթ, իսկ ծախսերը՝ 41,7 միլիարդ մանաթ։ Բյուջեի դեֆիցիտը կկազմի 3,1 միլիարդ մանաթ։ Բյուջեի ծախսերը կկազմեն ՀՆԱ-ի 31,1%-ը, եկամուտները՝ 28,8%-ը, իսկ դեֆիցիտը կկազմի ՀՆԱ-ի 2,3%-ը»,- ասել է նա։

Ավելի վաղ ադրբեջանական լրատվամիջոցները հայտնել էին, որ պաշտպանությանն ու անվտանգությանը հատկացվող 8,7 միլիարդ մանաթից ավելի քան 3 միլիարդ մանաթը կհատկացվի զինված ուժերին, 480 միլիոն 623 հազար մանաթը՝ ազգային անվտանգությանը, 541 միլիոն 633 հազար մանաթը՝ սահմանապահ ծառայություններին, 5 միլիոն մանաթից մի փոքր ավելին՝ պաշտպանության և ազգային անվտանգության ոլորտում կիրառական հետազոտություններին, իսկ 4 միլիարդ 656 միլիոն 698 հազար  մանաթը՝ պաշտպանության և ազգային անվտանգության հետ կապված այլ գործունեությանը:

Թարգմանությունը՝ Էմմա Չոբանյանի