ՌԴ ՊՆ-ն հայտարարել է՝ Ուկրաինան ATACMS հրթիռներով հարվածել է Վորոնեժին

Ռուսաստանի պաշտպանության նախարարությունը հայտարարել է, որ նոյեմբերի 18-ին Ուկրաինայի զինված ուժերը «փորձ են կատարել» հարվածել Վորոնեժին՝ օգտագործելով ամերիկյան ATACMS հեռահար հրթիռներ: Ըստ նախարարության՝ Ուկրաինայի զինված ուժերն արձակել են չորս հրթիռ, գրում է Meduza-ն։

Ռուսական գերատեսչությունը պնդում է, որ բոլոր չորս հրթիռներն էլ խոցվել են C-400 և Պանցիր համակարգերի կողմից: Հրթիռների բեկորները վնասել են Վորոնեժի տարածաշրջանային տարեցների կենտրոնի և մանկատան տանիքները, ինչպես նաև մասնավոր տուն։

«Խաղաղ բնակիչների շրջանում զոհեր կամ վիրավորներ չկան»,- հայտարարել է գերատեսչությունը։

Պաշտպանության նախարարությունը նաև պնդում է, որ ռուսական ուժերը Խարկովի մարզում հայտնաբերել են ATACMS հրթիռների արձակման վայրը, իսկ Վոլոսկա-Բալակլեյա գյուղի մոտակայքում հայտնաբերվել են երկու MLRS արձակման սարքեր։ Նշվում է, որ դրանք թիրախավորվել են հրթիռային հարվածով, «որի հետևանքով ոչնչացվել են երկու MLRS արձակման սարքեր՝ զինամթերքով, ինչպես նաև մարտական ​​անձնակազմ (մինչև 10 հոգի)»։

ՌԴ ՊՆ-ն պնդում է, թե Ուկրաինան ATACMS հրթիռներով հարվածներ է հասցրել քաղաքացիական թիրախներին։

Նոյեմբերի 18-ի երեկոյան Ուկրաինայի զինված ուժերի գլխավոր շտաբը հայտարարել էր, որ ուկրաինական ուժերը Ռուսաստանի ուղղությամբ հարվածներ հասցնելիս օգտագործել են ամերիկյան ATACMS հեռահար բալիստիկ հրթիռներ: Գլխավոր շտաբի տվյալներով՝ հարձակումն ուղղված է եղել Ռուսաստանում չնշված ռազմական օբյեկտների դեմ: Գլխավոր շտաբի հայտարարությունից հետո ուկրաինական լրատվամիջոցները և տելեգրամ ալիքները ենթադրություններ են տարածել, որ Ուկրաինան, հնարավոր է, օգտագործել է ATACMS հրթիռներ Վորոնեժին հարվածելիս։

Վորոնեժում է տեղակայված Բալթիմոր ավիաբազան: Այնտեղ գտնվում է 47-րդ ռմբակոծիչ ավիագունդը, որն ակտիվորեն օգտագործում է Սու-34 ռմբակոծիչները Ուկրաինային հարվածներ հասցնելիս:

Թարգմանությունը՝ Էմմա Չոբանյանի