19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Թրամփը հայտարարել է, որ ԱՄՆ-ը F-35-ներ կվաճառի Սաուդյան Արաբիային
Քաղաքականություն
19.11.2025 | 13:31
ԱՄՆ նախագահ Դոնալդ Թրամփը Սպիտակ տանը հանդիպմանը պաշտպանել է Սաուդյան Արաբիայի թագաժառանգ Մուհամմեդ բին Սալմանին 2018 թվականին լրագրող Ջամալ Խաշոգջիի սպանության կապակցությամբ՝ պնդելով, որ թագավորության փաստացի կառավարիչը «ոչինչ չի իմացել» սպանության մասին, գրում է France 24-ը։
Միացյալ Նահանգներն ու Սաուդյան Արաբիան հավանություն են տվել քաղաքացիական միջուկային համաձայնագրին և F-35 ինքնաթիռների վաճառքին, միաժամանակ, Թրամփը փորձել է թաքցնել Washington Post-ի սյունակագրի սպանությունն ու մարմնի մասնատումը։
«Շատերը չէին սիրում այս պարոնին, որի մասին դուք խոսում եք։ Անկախ նրանից՝ դուք նրան սիրում էիք, թե չէիք սիրում, բաներ են տեղի ունեցել, բայց նա [արքայազնը] ոչինչ չգիտեր այդ մասին: Եվ մենք կարող ենք այդպես թողնել: Դուք պարտավոր չեք մեր հյուրին ամաչեցնել նման հարց տալով»,- Խաշոգջիի սպանության մասին սաուդյան միապետին ուղղված հարցին պատասխանել է Թրամփը։
Թրամփի մեկնաբանությունները հակասում են ԱՄՆ հետախուզության 2021 թվականի գնահատականին, որը եզրակացրել էր, որ արքայազն Մուհամմեդն է հրամայել սպանել Խաշոգջիին, որն իրականացվել է Ստամբուլում Սաուդյան Արաբիայի հյուպատոսարանում: Սաուդյան Արաբիայի իշխանություններն այնուհետ մեղադրել էին անօրինական գործակալներին:
Ինչ վերաբերում է երկու երկրների ղեկավարների բանակցություններին, դրանց արդյունքներով երկու երկրները համագործակցության խորացմանն ուղղված մի շարք համաձայնագրեր են ստորագրել։ Սպիտակ տունը հայտարարել է, որ վավերացրել են «քաղաքացիական միջուկային էներգիայի համագործակցության համաձայնագիրը»՝ ԱՄՆ-ի և Սաուդյան Արաբիայի միջև միլիարդավոր դոլարների գործընկերության համար, որը կտևի տասնամյակներ։
Թրամփը նաև հաստատել է «պաշտպանական ապրանքների վաճառքի խոշոր փաթեթը», որը ներառում է F-35-ների «ապագա մատակարարումները»։ Նրանք նաև համաձայնել են կիսվել արհեստական բանականության տեխնոլոգիաներով՝ «միաժամանակ պաշտպանելով ամերիկյան տեխնոլոգիաները արտաքին ազդեցությունից»։
Թարգմանությունը՝ Էմմա Չոբանյանի
