29.07.2026 | 15:41
ԵԿՄ-ն լրագրողներն են լուծարել. ես և´ նախագահ եմ լինելու, և´ պատգամավոր. Սասուն Միքայելյան․ ՏԵՍԱՆՅՈՒԹ
Մենք կարևորում ենք Մալայզիայի հետ հարաբերությունները. ՀՀ նախագահը՝ դեսպանին
Քաղաքականություն
18.11.2025 | 23:28
Հայաստանի Հանրապետությունում Մալայզիայի դեսպան Դաթո Չոնգ Լուն-Լայը Հանրապետության նախագահ Վահագն Խաչատուրյանին հանձնել է հավատարմագրերն ու քննարկել երկու երկրների բարեկամական հարաբերությունների խորացման, բարձր տեխնոլոգիաների, ՏՏ, զբոսաշրջության և մշակութային փոխգործակցության հնարավորությունները:
«Նախագահը շնորհավորել է դեսպանին՝ նշելով, որ Հայաստանի և Մալայզիայի հարաբերությունները բարեկամական են և ունեն զարգացման մեծ ներուժ։ «Մենք կարևորում ենք Մալայզիայի հետ հարաբերությունները։ Հուսով եմ, որ Ձեր նշանակմամբ մեր երկկողմ համագործակցությունն առավել կակտիվանա»,– նշել է նախագահ Խաչատուրյանը։
Դեսպան Դաթո Չոնգ Լուն-Լայը շնորհակալություն է հայտնել ընդունելության համար՝ ընդգծելով. «Շնորհակալություն, պարոն նախագահ, ընդունելության և այս կարևոր հնարավորության համար։ Մենք խորապես գնահատում ենք Ձեր երկրում մեզ ցուցաբերված ջերմ ընդունելությունն ու հյուրընկալությունը»։
Հանդիպման ընթացքում կողմերն անդրադարձել են երկու երկրների հարաբերությունների ներկա վիճակին և դրանց զարգացման հնարավորություններին։ Քննարկվել են երկուստեք հետաքրքրություն ներկայացնող ոլորտներում՝ հատկապես բարձր տեխնոլոգիաների, տեղեկատվական տեխնոլոգիաների և այլ բնագավառներում համագործակցությունը խորացնելու ուղիները։
Կողմերը շեշտել են նաև զբոսաշրջության և մշակութային փոխգործակցության ընդլայնման կարևորությունը՝ այդ ոլորտները դիտարկելով որպես ժողովուրդների մերձեցման և փոխըմբռնման ամրապնդման հիմնասյուներ։
Անդրադարձ է կատարվել երկու երկրների միջև քաղաքական բարձր մակարդակի շփումների ակտիվացման կարևորությանը, ինչը կնպաստի տարբեր ուղղություններով համագործակցության սերտացման:
Հանդիպմանը մտքեր են փոխանակվել 2026-ին Հայաստանում կայանալիք COP-17 ՄԱԿ-ի Կենսաբազմազանության համաժողովի անցկացման վերաբերյալ:
Զրույցի ընթացքում ընդգծվել է միջազգային հարթակներում և տարբեր ձևաչափերում գործակցության խթանումը»,- ասված է հաղորդագրության մեջ:
